ანდრია გვიდიანი: ბოლო წლების განმავლობაში განხორციელებული რეფორმები იძლევა იმის საფუძველს, რომ ეკონომიკური რეიტინგები იყოს პოზიტიური

რეიტინგების გამოქვეყნების დანიშნულება არის ის, რომ ბევრი კომპონენტის მიხედვით შეაფასო, რამდენად სწორად ვითარდება ქვეყანა. რამდენად სწორი მიმართულებით მიდის ის რეფორმები, რომლებიც ხორციელდება ქვეყანაში, - ამის შესახებ ექსპერტმა ანდრია გვიდიანმა „დღის ქრონიკაში“ განაცხადა.

„ჰერითიჯის ფონდის“ კვლევა არის სახელმძღვანელო ინვესტორებისთვის, რომელ ქვეყნაში ღირს ინვესტიციის განხორციელება, რომელ ქვეყანაშია ნორმალური ეკონომიკური ვითარება, რომელ ქვეყანაში არის ისეთი საინვესტიციო გარემო, რომ მათ ფინანსურ კაპიტალს საფრთხე არ შეექმნას. ამ კვლევაში ბევრი საინტერესო დეტალია. მოქმედი ხელისუფლების პირობებში, ანუ 2013 წლის შემდეგ 55 ქულიდან 77 ქულამდე ავიდა ზოგადი შეფასება ქვეყნის, რაც იმაზე მიუთითებს, რომ ქვეყნის ეკონომიკური ვითარება არის წლიდან წლამდე გაუმჯობესებული და შესაბამისად ტენდენცია არის პოზიტიური. ეს ფასდება ბევრი კომპონენტით, მათ შორის, ფისკალური გამჭვირვალობა; საგადასახადო წნეხი; სასამართლოს თავისუფლება; დასაქმებულთა უფლებები და ა.შ. აქედან გამომდინარე, ჩვენ შეგვიძლია ვთქვათ, რომ მოქმედი ხელისუფლების პირობებში ეკონომიკური რეფორმები, ის სისტემური რეფორმები, რომელიც განხორციელდა ბოლო წლების განმავლობაში, იძლევა იმის საფუძველს, რომ ეკონომიკური რეიტინგები იყოს პოზიტიური“, - განაცხადა გვიდიანმა.

„ჰერითიჯის ფონდის“ კვლევის მიხედვით საქართველო, 77.2 საერთო ქულით, მსოფლიოში მე-12, ხოლო ევროპის რეგიონის 45 სახელმწიფოს შორის მე-7 ყველაზე თავისუფალ ეკონომიკად არის დასახელებული და 2020 წლის ინდექსთან ანუ პრეკრიზისულ პერიოდთან შედარებით, ქვეყანამ 0.1 ქულით გაიუმჯობესა თავისი მონაცემები რეიტინგის 5 ისეთ მნიშვნელოვან კომპონენტში როგორიცაა: სასამართლოს ეფექტიანობა (59.3 ქულა), საგადასახადო ტვირთი (89.1 ქულა), სამთავრობო ხარჯები (76.9 ქულა), ფისკალური თავისუფლება (94.9 ქულა) და შრომის თავისუფლება (76.7 ქულა).