ნათია თურნავა: ჩვენ ყველას დავანახეთ, რომ ერთი ლარი, რომელიც „აწარმოე საქართველოში“ პროგრამის მეშვეობით გაღებულია მცირე და საშუალო მეურნეობებისთვის, 5 ლარის სახით უბრუნდება ბიუჯეტს

ჩვენ ყველას დავანახეთ, რომ ერთი ლარი, რომელიც ამ პროგრამების მეშვეობით გაღებულია მცირე და საშუალო მეურნეობებისთვის, 5 ლარის სახით უბრუნდება ბიუჯეტს გადახდილი გადასახადის ფორმით. ანუ, 5-ჯერ უფრო მეტი შემოსავალი გვაქვს ჩვენ, როდესაც ერთ ლარს ჩავდებთ ასეთ წარმოებაში, - ამის შესახებ ეკონომიკის მინისტრმა ნათია თურნავამ „ქრონიკაში ჩართვისას განაცხადა.

მისი თქმით, 2014 წლიდან საქართველოში მოქმედებს პროგრამა „აწარმოე საქართველოში“, რომელიც თავის თავში რამდენიმე პროექტს აერთიანებს. კერძოდ, მცირე და საშუალო წარმოებისთვის სესხის პროცენტის სუბსიდირებას, სოფლის მეურნეობის პროგრამებს, საინვესტიციო ვალდებულებებით მიწის გადაცემას და სხვა პროექტებს.

მინისტრის თქმით, დღეს სამინისტროს მიერ გამართულ პრეზენტაციაზე შეაჯამეს, თუ რა შედეგი ჰქონდა ამ პროგრამებს ქვეყნისთვის და ამასთან წარმოადგინეს სოფლის მეურნეობის სამინისტროსთან ერთად შექმნილი ე.წ ინტერაქციული რუკა. თურნავამ აღნიშნა, რომ იგი სპეციალურ ვებ-გვერდზე - www.programs.gov.ge განთავსდება, სადაც სახელმწიფო პროგრამების შესახებაა ინფორმაცია.

„შედეგად, დღეიდან ნებისმიერ დაინტერესებულ პირს შეეძლება, კონკრეტულ რეგიონში ნებისმიერ საწარმო ნახოს ამ 1 806 საწარმოდან, რომელიც სწორედ „აწარმოე საქართველოში“ პროგრამის წყალობით შეიქმნა. მითითებულია კონკრეტულად, საწარმოს მისამართი, დარგი, რა მოცულობის ინვესტიცია ჩაიდო და რაც მთავარია, რამდენი დასაქმებული ადამიანი შეემატა საქართველოს ამ პროგრამის მეშვეობით“, - განაცხადა თურნავამ.

ეკონომიკისა და მდგრადი განვითარების მინისტრმა ნათია თურნავამ და გარემოს დაცვისა და სოფლის მეურნეობის მინისტრმა ლევან დავითაშვილმა დღეს სახელმწიფოს მხარდაჭერით განხორციელებული ბიზნეს პროექტების პრეზენტაცია გამართეს.

როგორც პრეზენტაციაზე ითქვა, 2013 წლიდან სახელმწიფოს მხარდაჭერით 1 806 ბიზნეს პროექტი განხორციელდა, მოზიდულმა ინვესტიციამ 2,5 მლრდ ლარი შეადგინა და 53 000-მდე ახალი სამუშაო ადგილი შეიქმნა.