ლადო პაპავა: მთავრობას დაუგროვდა გამოცდილება, თუ როგორ წარვმართოთ ეკონომიკა პანდემიის პირობებში

მივესალმები, მთავრობის პოზიტიურ მოლოდინს ეკონომიკის ზრდასთან დაკავშირებით, რადგან მას უნდა ჰქონდეს პოზიტიური მოლოდინი, ხოლო თუ რაიმე სირთულეები შეიქმნება, ამისთვისაც მზად უნდა იყოს, - ამის შესახებ ეკონომისტმა, პროფესორმა ლადო პაპავამ „ქრონიკაში“ ჩართვისას განაცხადა.

პაპავამ ქვეყანაში ეკონომიკის მზარდი ტენდენციის შენარჩუნების აუცილებლობაზე ისაუბრა.

მისი თქმით, მთელ მსოფლიოს და მათ შორის საქართველოს ხელისუფლებას დაუგროვდა გამოცდილება, თუ როგორ უნდა მართოს ეკონომიკა პანდემიის პირობებშიც.

„ბოლო პერიოდში მთავრობამ ძალიან მნიშვნელოვანი ნაბიჯი გადადგა, გაზარდა პროექტში „აწარმოე საქართველოში“ ისეთი მიმართულებების დაფინანსება, როგორიც არის სოფლის მეურნეობა, კვების მრეწველობა და ზოგადად, მრეწველობა. ეს არის ერთადერთი სწორი გზა! ეს არ ნიშნავს, რომ ჩვენ ტურიზმის განვითარებაზე უარი უნდა ვთქვათ, მაგრამ ეკონომიკის ზრდის ტემპი რომ იყოს მაღალი და რაც მთავარია - სტაბილური, უფრო მეტად ფოკუსირება დღეს უნდა მოხდეს სოფლის მეურნეობისა და მრეწველობის განვითარებაზე. თუმცა, არსებობს უფრო გრძელვადიანი ამოცანაც, რაც მთავრობას მისახედი აქვს. ქვეყნის ეკონომიკური მოდელი გახდეს ის, რასაც მსოფლიოში ცოდნაზე დაფუძნებულ ეკონომიკას ეძახიან, ანუ მაღალტექნოლოგიური პროდუქტების შექმნა. შესაბამისად - მეცნიერებაზე ორიენტირებული ეკონომიკის მოდელი უნდა შეიქმნას. ამას ცოტა მეტი დრო სჭირდება, მაგრამ გრძელვადიან პერსპექტივაში მხოლოდ ეს არის იმის საფუძველი, რომ ქვეყანამ ერთხელ და სამუდამოდ, თავი დააღწიოს მძიმე ეკონომიკურ სიტუაციას და სტაბილურად განვითარებადი იყოს. თანდათანობით კი ამ ქვეყანაში შეიქმნას უფრო მეტი სიმდიდრე“, - განაცხადა პაპავამ.

საქართველოს პრემიერ-მინისტრმა, ირაკლი ღარიბაშვილმა დღეს მთავრობის სხდომაზე განაცხადა, რომ 2022 წლის იანვარში მთლიანი შიდა პროდუქტი 65 მილიარდი ლარი იქნება, რაც ისტორიული მაქსიმუმია.