ვლადიმერ პაპავა სოციალური პოლიტიკის ცვლილებაზე: თუ სოციალური პაკეტის მიმღები შრომისუნარიანია, უკეთესია დასაქმების შესაძლებლობა მიეცეს

პრემიერ-მინისტრის იდეა სოციალურ პოლიტიკაში ცვლილებების შესახებ აბსოლუტურად სწორია, - ამის შესახებ ეკონომიკის ექსპერტმა ვლადიმერ პაპავამ ტელეკომპანია „იმედის“ ეთერში, „ქრონიკაში“ სოციალური პოლიტიკის დაანონსებულ პროგრამაზე საუბრისას განაცხადა.

„ჩვენი ქვეყნის მიზანია რომ ეკონომიკური ზრდა იყოს ინკლუზიური, ანუ მოსახლეობა ჩართული იყოს ეკონომიკურ ზრდაში. ამიტომ, ყველა ის ვინც სოციალურ პაკეტს იღებს და შრომისუნარიანია, უკეთესია, არა უშუალოდ სოციალური დახმარება მიიღოს, არამედ მიეცეს შესაძლებლობა, რომ დასაქმდეს და გარკვეული პროფესია შეიძინოს, რათა თავად უზრუნველყოს თავისი და ოჯახის მომავალი არსებობა პირადი შემოსავლებით. აბსოლუტურად სწორი მიდგომაა და მთავრია ახლა როგორია ახლა როგორი მექანიზმით მოხდება ამის განხორციელება და შესაბამისად მთავრობას აქვს დავალება, რომ შესაბამისი პროგრამა წარმოადგინოს,“- აღნიშნა პაპავამ.

დღეს პრემიერ-მინისტრმა განაცხადა, რომ მთავრობა სოციალური პოლიტიკის ახალ ხედვაზე დაფუძნებულ პროგრამაზე მუშაობს. ირაკლი ღარიბაშვილის ინიციატივით, იგეგმება სამუშაო ჯგუფის შექმნა, რომელსაც ვიცე-პრემიერი ლევან დავითაშვილი უხელმძღვანელებს. „ნაცვლად სოციალური დახმარებისა, შრომისუნარიან მოქალაქეებს სამუშაო ადგილები უნდა შევთავაზოთ - დაახლოებით, 600 ათასი სოციალურად დაუცველი მოქალაქე გვყავს და მათგან თითქმის ნახევარი შრომისუნარიანია“, - აღნიშნა პრემიერმა