RMG Gold-ი: კომპანიის წინააღმდეგ ბრალდებები რეალობას არ შეესაბამება

კომპანია RMG Gold-ი საყდრისის კომიტეტის განცხადებას ეხმაურება, რომლის მიხედვითაც, კომპანიის კუთვნილმა მძიმე ტექნიკამ ფიტარეთის სამონასტრო კომპლექსის ტერიტორიაზე სამუშაოები დაიწყო, რის შედეგადაც მონასტრის ნაწილი დაზიანდა. კომპანიაში აცხადებენ, რომ გავრცელებული ინფორმაცია "რეალობას არ შეესაბამება". ინფორმაციას ipress-ი ავრცელებს.

RMG Gold-ის განცხადებით, კომპანია ფიტარეთის მოქმედი სამონასტრო კომპლექსის ოფიციალურ და საეკლესიო პირებთან თანამშრომლობს, რომლებმაც კომპანიას ტექნიკური დახმარების თხოვნით მიმართეს და მათაც საეკლესიო პირებს ტექნიკა ათხოვეს.

"გვინდა გამოვეხმაუროთ ფიტარეთის მონასტერთან დაკავშირებით საყდრისის კომიტეტის მიერ გავრცელებულ მორიგ განცხადებას და განვაცხადოთ, რომ, ამჯერადაც, გავრცელებული ინფორმაცია არ შეესაბამება რეალობას! აღნიშნული ტერიტორია კომპანიის საქმიანობასთან არ არის კავშირში და ეს საყდრისის კომიტეტში კარგად უნდა იცოდნენ! მეტიც, კომპანიის საქმიანობა არ ეხება სამონასტრო კომპლექსს და არც გარშემო ტერიტორიას.

კომპანია RMG Gold-ი თანამშრომლობს ფიტარეთის მოქმედი სამონასტრო კომპლექსის ოფიციალურ და საეკლესიო პირებთან. ჩვენი თანამშრომლობა შეეხება სამონასტრო კომპლექსის დაცვისა და მასზე მზრუნველობის საკითხებს. ამჯერად, მონასტრის მომსახურე პირებმა მოგვმართეს ტექნიკური დახმარების თხოვნით და ჩვენ მათ მხოლოდ ტექნიკა ვათხოვეთ. შესაბამისად, სამუშაოთა დაგეგმვასა და წარმოებაზე ჩვენი კომპანია არ არის პასუხისმგებელი. რამდენადაც ჩვენთვის ცნობილია, აღნიშნული საკითხის დეტალები კარგად იციან საყდრისის კომიტეტშიც. ამის მიუხედავად, კომიტეტის მხრიდან კომპანია RMG-ს მიმართ, ჩვენი მოსაზრებით, მიზანმიმართულად ვრცელდება არასწორი ინფორმაცია.

კომპანია RMG-ი ბოლნისისა და დმანისის რაიონში უკვე წლებია, ახორციელებს არაერთ პროექტს. ადგილობრივ მუნიციპალიტეტებთან ერთად ჩვენ ვმონაწილეობთ სხვადასხვა სახის ინფრასტრუქტურულ და სოციალურ პროექტებში, აღვადგენთ გზებს, ვარემონტებთ სკოლებსა და ბაღებს, ვეხმარებით კულტურულ თუ სპორტულ კოლექტივებს და სამომავლოდაც მზად ვართ, ვაკეთოთ რეალური სიკეთე და საჭირო საქმე.

ვფიქრობთ, კომპანია RMG Gold-ის მიმართ საყდრისის კომიტეტის წევრები დაგეგმილად და მიზანმიმართულად ავრცელებენ არასწორ და გადაუმოწმებელ ინფორმაციას. ჩვენი მხრიდან, კომიტეტთან არაერთგზის გამოვთქვით საქმიანი და კონკრეტული ორმხრივი თანამშრომლობის სურვილი. ამის მიუხედავად, მათი მხრიდან მუდმივად არის ფაქტების დამახინჯებისა და ინფორმაციის მათთვის სასურველი ინტერპრეტაციით გავრცელების მცდელობები.

აღნიშნული ორგანიზაცია მსგავსი განცხადებებით ახორციელებს არა მხოლოდ ჩვენი საქმიანი რეპუტაციის შემლახავ და ცილისმწამებლურ კამპანიას, არამედ ცდილობს, საზოგადოებრივი აზრით მანიპულირებას. კომპანია RMG-ის მუშაობა არის ღია და ჩვენი გუნდი მოქმედებს მოქმედი კანონმდებლობის სრული დაცვით და საკუთარი სოციალური პასუხისმგებლობის ფარგლებში. ჩვენი ქმედებები, კომპანიის საქმიანი ინტერესების გარდა, განპირობებულია ქვეყნის, ადამიანებისა და გარემოს მიმართ არსებული პასუხისმგებლობით", - აცხადებენ კომპანიაში.

საყდრისის კომიტეტმა დღეს გამართულ პრესკონფერენციაზე ფიტარეთის სამონასტრო კომპლექსის ე.წ დაცვითი ზონის ტერიტორიაზე დაზიანების დამამტკიცებელი ფოტომასალა წარმოადგინა. 

RMG Gold-მა საცდელი აფეთქება, ფიტარეთიდან 2 კილომეტრის მოშორებით აგვისტოს დასაწყისში განახორციელა. ამასთან დაკავშირებით, საყდრისის კომიტეტის წევრებმა გამაფრთხილებელი აქცია 4 აგვისტოს გამართეს. 5 აგვისტოს კულტურული მემკვიდრეობის დაცვის სააგენტომ განაცხადა, რომ RMG Gold-თან ფიტარეთში აფეთქება შეთანხმებული არ ყოფილა.