მაია ბითაძე: ჩვენი პირველადი პრიორიტეტია, რომ სახელმწიფო არ ჩაერიოს უხეშად ბიზნესში, მეორე კუთხით გვაქვს დიდი პასუხისმგებლობა მოსახლეობის წინაშე და ეს სოციალური პასუხისმგებლობა ასევე უნდა ჰქონდეთ ბიზნესის წარმომადგენლებს

სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელი საქართველოს პარლამენტის დროებითი კომისიის პირველი სხდომა მაია ბითაძემ „დღის ქრონიკაში“ შეაფასა.

გარემოს დაცვისა და ბუნებრივი რესურსების კომიტეტის თავმჯდომარემ აღნიშნა, რომ რამდენიმე კომპლექსური საკითხია, რომელზეც მოუწევთ შეთანხმება როგორც პარლამენტს, ისე მთავრობასა და ბიზნესს.

მისივე თქმით, კომისიის მუშაობის მთავარი პრინციპი დაყრდნობილი იქნება იმ პრინციპზე, რომ საქართველოს მოსახლეობისთვის ტვირთი მაქსიმალურად შემსუბუქდეს.

„ჩვენთვის, ეკონომიკური წონასწორობის შენარჩუნება ერთ-ერთი მთავარი პრიორიტეტია. სწორედ ეკონომიკური წონასწორობა, მშვიდობა და სტაბილურობა უზრუნველყოფს საინვესტიციო გარემოს ზრდას.

ამ ფონზე, როდესაც ვსაუბრობთ, რომ საქართველოს ეკონომიკა იზრდება, იზრდება ხელფასები და ასევე მოსახლეობის მსყიდველუნარიანობაც, ბოლო წლებში ვაკვირდებით, რომ პარალელურად ფასებიც იზრდება. შემოსავლებისა და ფასების ზრდა პრაქტიკულად ერთნაირი დინამიკით ვითარდება.

მიუხედავად იმისა, რომ მუშაობა სამთავრობო დონეზე დიდი ხანია დაწყებულია, არსებობს გარკვეული კვლევები. საინტერესო იყო პირველი სხდომა, რომელიც დღეს პარლამენტში გაიმართა. ეს იყო პირველი შეხვედრა, სადაც მოსახლეობას საშუალება ჰქონდა თავისი ყურით მოესმინა ის დეტალები, რაც ზეგავლენას ახდენს ფასწარმოქმნაზე.

დღეს მოვისმინეთ, რომ არის რამდენიმე ძირითადი მიმართულება, რომელიც განსაკუთრებულ დიდ ეფექტს ახდენს იმ ფასნამატზე, რომელზედაც ყველა ძალიან ვწუხვართ.

კარგად გვესმის, რომ ქსელური მარკეტები, დისტრიბუცია, მწარმოებლები, სწორედ ის კომპონენტია ჩვენი ეკონომიკის, რომელსაც სრული ხელშეწყობა უნდა ჰქონდეს სახელმწიფოს მხრიდან. ჩვენი პირველადი პრიორიტეტია, რომ სახელმწიფო არ ჩაერიოს უხეშად ბიზნესში, მაგრამ მეორე კუთხით ჩვენ გვაქვს დიდი პასუხისმგებლობა ჩვენი მოსახლეობის წინაშე და ეს სოციალური პასუხისმგებლობა ასევე უნდა ჰქონდეთ ბიზნესის წარმომადგენლებს. ჩვენ ყველამ ერთად უნდა ვეცადოთ ვიპოვოთ ის სიცარიელეები, რომლის ამოვსება ჩვენ შეგვეძლება.

დღეს მოვისმინეთ, რომ რეტრობონუსი დიდ როლს თამაშობს ფასნამატის წარმოქმნაში. ასევე არსებობს სხვა გადასახადები, რომელიც ორ ბიზნესსუბიექტს შორის არსებობს, რაც დიდ ზეგავლენას ახდენს ფასნამატზე. ეს ყველაფერი გამოსაკვლევია.

დღეს ასევე საინტერესო მიგნებები გაკეთდა, რომელიც პროდუქტის ნაშთების მართვასთან ერთად გამოიკვეთა. ასევე გაირკვა, რომ საკმაოდ დიდი პრობლემაა დისტრიბუტორებისა და მწარმოებლებისთვის ქსელური მარკეტების მხრიდან თანხის დაბრუნების ვადების დაგვიანებასთან მიმართებით. ჩვენ ოპტიმისტურად ვართ განწყობილი სამომავლო შეხვედრებთან დაკავშირებით“, - აღნიშნა მაია ბითაძემ.

პარლამენტში სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელი დროებითი კომისიის სხდომა გაიმართა. კომისიის წევრები ადგილობრივი ხორც პროდუქტების, რძის პროდუქტების და კვერცხის მწარმოებელი კომპანიების წარმომადგენლებს შეხვდნენ.