მარიამ ქვრივიშვილი: ბიზნესისადმი მეგობრული გარემო და საკანონმდებლო მხარდაჭერა, უზრუნველყოფს ქვეყანაში ინვესტორის დაცულობასა და ფინანსებზე ბიზნესის ხელმისაწვდომობის ზრდას

„ჩვენი საფინანსო სექტორი არა მხოლოდ რეგიონში, არამედ მსოფლიოში მდგრადობით და მაღალტექნოლოგიური გადაწყვეტებით გამოირჩევა. მთავრობა, ეროვნულ ბანკთან ერთად, განსაკუთრებით ბოლო 5 წლის განმავლობაში, აქტიურად მუშაობს, რომ ფინანსური სექტორი, კაპიტალის ბაზრის და საბანკო სექტორის ჩათვლით, კიდევ უფრო მეტად გაძლიერდეს, ასევე კიდევ უფრო მეტად ამაღლდეს გლობალური კონკურენტუნარიანობა, რისთვისაც ფინანსური ტექნოლოგიების განვითარება ერთ-ერთი პრიორიტეტია“, - განაცხადა ეკონომიკისა და მდგრადი განვითარების მინისტრმა მარიამ ქვრივიშვილმა საერთაშორისო ფინანსური სერვისების პლატფორმის Bybit - ის საქართველოს წარმომადგენლობის გახსნის ღონისძიებაზე სიტყვით გამოსვლისას.

მინისტრმა ყურადღება გაამახვილა საკანონმდებლო ინიციატივებზე, რომელთა ამოქმედებამაც მნიშვნელოვნად შეუწყო ხელი ქვეყანაში ფინანსური სექტორის განვითარებას. მარიამ ქვრივიშვილის თქმით, აღნიშნული სიახლეები ხელს შეუწყობს საქართველოს ფინანსური სექტორის შემდგომ განვითარებას, კონკურენციის ზრდას და ახალი ტექნოლოგიების უსაფრთხოდ დანერგვას.

სიტყვით გამოსვლისას, მინისტრმა დადებითად შეაფასა ქვეყანაში მსოფლიოში სიდიდით მეორე კრიპტოაქტივების ბირჟის Bybit - ის საქართველოში ოფიციალურად შემოსვლა და იმედი გამოთქვა, რომ მისი აქტივობით გაიზრდება ფინანსური სექტორის ამ სეგმენტში კონკურენცია და მოხდება მომხმარებლებისთვის კიდევ უფრო მეტად ხარისხიანი და უსაფრთხო საფინანსო პროდუქტების მიწოდება.

„დღეს საქართველოში უკვე 3 ციფრული ბანკი ფუნქციონირებს. 2023 წლის შემდეგ კაპიტალის ბაზრის მოცულობა გაორმაგებულია და იზრდება საინვესტიციო ფონდების ჯამური ზომაც. ჩვენი ფინტექ კომპანიები და ტრადიციული ფინანსური ინსტიტუტები რეგიონში მოწინავე პოზიციებზე არიან წარმოდგენილნი, ხოლო საკანონმდებლო და მარეგულირებელი ჩარჩო კი გამოირჩევა თანამედროვე მიდგომებით და უზრუნველყოფს ინვესტორის დაცულობასა და ფინანსებზე ბიზნესის გაუმჯობესებულ ხელმისაწვდომობას“, - აღნიშნა მინისტრმა.

ღონისძიებაზე Bybit Georgia-მ Mastercard-თან ერთად ბაზარზე პირველად საქართველოში Bybit Card-ის პრეზენტაცია გაიმართა.

Bybit - მა საქართველოში ოპერირება საქართველოს ეროვნული ბანკის მიერ გაცემული ვირტუალური აქტივების სერვისის პროვაიდერის (VASP) და საგადახდო სერვისის პროვაიდერის (PSP) რეგისტრაციის საფუძველზე დაიწყო.

Bybit-ის გლობალური ყოველდღიური ბრუნვა ათეულობით მილიარდ დოლარს შეადგენს, კომპანია ევროკავშირში ავტორიზებული პლატფორმით ოპერირებს და მომხმარებლებს სთავაზობს მრავალფეროვან პროდუქტებსა და მომსახურებებს ციფრული აქტივების ბაზარზე.

ღონისძიებაში ასევე მონაწილეობდნენ საქართველოს ეროვნული ბანკის პრეზიდენტმა ნათია თურნავამ, აგრეთვე ბიზნეს სექტორის წარმომადგენლებმა და საერთაშორისო პარტნიორებმა, მათ შორის, Mastercard - მა, Pave Bank - მა და Tether - მა.