ცნობილია პირობები, რის სანაცვლოდაც m² ცენტრ პოინტის მშენებლობებს დაასრულებს

კომპანია m²-სა და ცენტრ პოინტს შორის წინასწარი ხელშეკრულება გაფორმდა, რომელშიც იმ პირობების შესახებ წერია, რომლის შესრულების შემთხვევაშიც m²-ი ცენტრ პოინტის დაუსრულებელ მშენებლობებს დაასრულებს. ინფორმაციას 1tv ავრცელებს.

კომპანიის მიერ წარდგენილი გეგმის მიხედვით, ხელშეკრულებით გათვალისწინებული წინაპირობების შესრულების შემთხვევაში, m² მხოლოდ სამუშაოების შემსრულებელი კომპანია იქნება, რომელსაც „ცენტრ პოინტი“ დაიქირავებს. სანაცვლოდ კი, „ცენტრ პოინტი“ m2-ს მის საკუთრებაში არსებულ თავისუფალ უძრავ ქონებას გადასცემს. ამასთან, დაზარალებულ ბინათმესაკუთრეებთან ურთიერთობის საკითხი კვლავ „ცენტრ-პოინტის“ პრეროგატივად დარჩება.

ეს ყველაფერი კი იმ შემთხვევაში მოხდება, თუ m²-ის პირობებს ცენტრ პოინტი 6 თვის ვადაში შეასრულებს. 

„ცენტრ-პოინტის თხოვნით ჩვენ შევიმუშავეთ ამ უმწვავესი სოციალური პრობლემის გადაჭრის გეგმა, რომელიც ჩვენი კომპანიის, „ცენტრ-პოინტისა“ და სახელმწიფოს მჭიდრო და კოორდინირებულ თანამშრომლობას მოითხოვს. ეს პროექტი ჩვენთვის ნაკლებად მიმზიდველია ფინანსური კუთხით, მაგრამ ის  მნიშვნელოვანია სოაციალური კაპიტალის დაგროვების თვალსაზრისით. m2-ს სურვილი აქვს დაეხმაროს დაზარალებულ ოთხი ათას ოჯახს, საზოგადოებას, კომპანია „ცენტრ-პოინტსა“ და სახელმწიფოს ამ მრავალწლიანი და მრავალშრიანი პრობლემის მოგვარებაში“, – აცხადებს m2-ის გენერალური დირექტორი, ირაკლი ბურდილაძე.

პირობების შესრულების შემთხვევაში m² აცხადებს, რომ დაუსრულებელ კომპლექსებს სამ წელიწადში ააშენებს.

გასული წლის სექტემბერში imedinews-ი წერდა, რომ "ცენტრ პოინტის" აქტივებს სამშენებლო კომპანიები "X2" და "m²" ყიდულობდნენ, თუმცა მაშინ ეს ინფორმაცია კომპანიებმა უარყვეს. 

ოქტომბერში გავრცელდა ინფორმაცია, რომ m2 ცენტრ პოინტს და მის აქტივებს არ ყიდულობს, არამედ მხოლოდ დაზარალებულების დაკმაყოფილების პროცესშია ჩართული.