თბილისის აეროპორტში მართვის ახალი შენობა და სასწავლო ცენტრი 32 მილიონი ლარი დაჯდა

საქაერონავიგაციას თანამედროვე უახლესი ტექნოლოგიით აღჭურვილი საჰაერო მოძრაბის მართვის ახალი შენობა და სასწავლო ცენტრი აქვს.

გახსნის ცერემონიას პრემიერმინისტრი გიორგი კვირიკაშვილი, მთავრობის ეკონომიკური გუნდი და საავიაციო ბაზრის წარმომადგენლები ესწრებოდნენ.

„სისტემას აქვს სამმხრივი დაცვის მექანიზმი. გარდა ამისა, არსებობს პარალელური სისტემა, რომელიც დამონტაჟებულია ქუთაისში და თუ, მაგალითად, უბედური შემთხვევის დროს თბილისი მთლიანად გაითიშა, ქუთაისს ექნება შესაძლებლობა, სრულად მოახდინოს სისტემის უზრუნველყოფა და გამართული ფუნქციონირება. 32 მილიონი ლარის ინვესტირება არის განხორციელებული ჯამურად მთელ სისტემაში. ასევე ძალიან მნიშვნელოვანია ის სასწავლო ცენტრი, რომელიც დღეს გავხსენით. ეს არის 3D სიმულატორი, რომელიც შესაძლებლობას მოგვცემს, ერთი მხრივ, ჩვენი ავიამეთვალყურეები გადავამზადოთ, რაშიც ჩვენ მნიშვნელოვან თანხებს ვხარჯავდით და გარდა ამისა, სამომავლოდ, გავხადოთ ეს ცენტრი უკვე რეგიონულ სასწავლო ცენტრად და სხვა ქვეყნებიდანაც ჩამოვიყვანოთ ავიამეთვალყურეები, რათა მათ მეტი და მეტი ცოდნა მივცეთ“, – განაცხადა დიმიტრი ქუმსიშვილმა.

ახალი მართვის სისტემის შექმნა საჰაერო ნაკადების სიხშირემ განაპირობა, რომელიც წინა წელთან შედარებით 13 პროცენტით არის გაზრდილი. საჰაერო მოძრაობის მართვის ახალი შენობა და სასწავლო ცენტრი, ჯამში, 32 მილიონი ლარი დაჯდა.