რა რჩება და რა იცვლება თბილისის განვითარების დოკუმენტში

“სითი ინსტიტუტ საქართველომ“ თბილისის მიწათსარგებლობის გენერალური გეგმაზე მუშაობა უკვე დაასრულა და დედაქალაქის მერიას წარუდგინა. ინფორმაციას "ინტერპრესნიუსი" ავრცელებს.

სალუქვაძე ამბობს, რომ დოკუმენტზე მერიას შენიშვნები სავარაუდოდ, აღარ ექნება, რადგან ყველა შესწორება დოკუმენტში მერიის თანხმობით და მოთხოვნით შევიდა.  

სალუქვაძის თქმით, პირველი ცვლილება, რაც ძალიან მალე დაიწყება ქალაქში, კვლევების ჩატარება იქნება, ჩარჩო და განაშენიანების გეგმების შემუშავება, მათ შორის, საპარკო პროექტების მიმართულებით. 

რაც შეეხება 140 ათას ლარიან ჯარიმას, როგორც სალუქვაძე აცხადებს, მიუხედავად იმისა, ეთანხმება თუ არა გენგეგმაზე მომუშავე ჯგუფი, ჯარიმა მაინც უნდა გადაიხადონ.

თბილისის მიწათსარგებლობის გენერალურ გეგმაში რჩება 12 საბაგირო ხაზის მოწყობა, „ისთ ფოინთი - ლილოს“ მიწისზედა მეტროსა და სატვირთო მატარებლების შემოვლით რკინიგზაზე გადატანის საკითხი.

შეთანხმება მიღწეულია რკინიგზის მიმართულებით, სატვირთო ხაზის გადატანაზე.

რაც შეეხება სატრანსპორტო დერეფნებს, მერიამ მომდევნო 5 წლის განმავლობაში ერთი დერეფნის მოწესრიგება და ექსპლუატაციაში გაშვება მაინც უნდა მოახდინოს. 

გენგეგმაზე მომუშავე ჯგუფის ხელმძღვანელის, მამუკა სალუქვაძის თქმით, 12 საბაგირო ხაზი, რომელიც გენგეგმის დოკუმენტში აქამდეც იყო, უცვლელი რჩება, რაც შეეხება ტრამვაის ხაზს, თუ დედაქალაქის მერია სატრანპორტო დერეფნებს მოაწყობს, ამის გამოყენება ტრამვაის ხაზისთვისაც შესაძლებელი გახდება. 

გენგეგმის ჯგუფს მერიამ საბოლოო მე-6 ეტაპზე ერთი და იგივე საკითხები რამდენჯერმე დაუხარვეზა, რის გამოც, „სითი ინსტიტუტ საქართველოს“ 140 ათას ლარიანი ჯარიმა დაეკისრა. მერიის შენიშვნები ძირითადად ეხებოდა ზონირებას, ტრანსპორტს, რკინიგზას, კულტურული მემკვიდრეობის დამცავ ზონებს, ეფექტიანობის შეფასებას, განხორციელების ეტაპებს, რიგითობას და ეკონომიკას.

თბილისის განვითარების გენერალური გეგმის პროექტზე მუშაობა, რომელიც 2030 წლამდეა გაწერილი, 2015 წელს დაიწყო და დოკუმენტის შესაქმნელად 2 800 000 ლარი გამოიყო. დოკუმენტი თბილისის მერიას 3 იანვარს ჩაჰბარდა.

მიწათსარგებლობის გენერალური გეგმის 5 ეტაპი უკვე მიღებული და დამტკიცებულია.

მე-6 საბოლოო ეტაპზე მერიამ ჯგუფი ერთი და იმავე შენიშვნის სამჯერ გაუთვალისწინებლობისთვის გასული წლის დეკემბერში 140 ათასი ლარით დააჯარიმა.

მერიამ გენგეგმაზე სამუშაოდ სითი ინსტიტუტს ვადა 1 ივნისამდე მისცა.