გენგეგმის ჯგუფის უფროსი: მიწისზედა მეტროსთვის განკუთვნილი ტრასა სტანდარტებს ვერ აკმაყოფილებს

თბილისის გენერალურ გეგმაზე მომუშავე ჯგუფის, „სითი ინსტიტუტი საქართველოს“ ხელმძღვანელი მამუკა სალუქვაძე აცხადებს, რომ ლილოს მიმართულებით მიწისზედა მეტროს გაკეთება კვლევის გარეშე არ შეიძლება. ინფორმაციას სააგენტო "ინტეპრესნიუსი" ავრცელებს.

მამუკა სალუქვაძის თქმით, მეტროს გაგრძელება ბევრი მიმართულებით არის საჭირო, რადგან ეკოლოგიურად სუფთა ტრანსპორტია. თუმცა სალუქვაძე ფიქრობს, რომ ლილოს მიმართულებით დღეს გამოუყენებელი ინფრასტრუქტურაა, რომელიც შეიძლება მერიამ გამოიყენოს ისე, რომ ძალიან ბევრი ფინანსური საშუალებები არ დაიხარჯოს. 

"ფაქტობრივად, ტრასა მოწყობილია, მიწის სამუშაოები გაკეთებულია. რა თქმა უნდა, ხვალ ვერ მიადგებიან, ნიჩაბს ვერ დაარტყამენ და მუშაობას ვერ დაიწყებენ. ყველა ასეთ პროექტს სჭირდება კვლევა, ამის გარეშე გაკეთება არ შეიძლება, რადგან ეს იყო გათვლილი რკინიგზის ტრანსპორტზე, ახლა საუბარია მეტროზე. ეს არის ის ტრასა, რომელიც შემოვლითი რკინიგზისთვის იყო განკუთვნილი, მაგრამ არა მხოლოდ ჩვენ, არამედ ბევრმა ექსპერტმა დაიწუნა. ძალიან ბევრი პარამეტრით სტანდარტებს ვერ აკმაყოფილებს. თბილისის ზღვისკენ რომელიც მიდის ბევრი ფაქტორის გამო იქნა დაწუნებული, მათ შორის ეკოლოგიური და ტექნიკურ საკითხების გამო. ამიტომ ვფიქრობ, რომ მეტროსთვის ამ ინფრასტრუქტურის გამოყენება რეალურია", - განაცხადა თბილისის გენგეგმაზე მომუშავე ჯგუფის ხელმძღვანელმა მამუკა სალუქვაძემ.

თბილისის მერმა, კახა კალაძემ და პრემიერმა მამუკა ბახტაძემ „მწვანე პოლიტიკა - ეკოტრანსპორტის“ პრეზენტაციაზე განაცხადეს, რომ მეტრო პირველ ეტაპზე მეტროსადგურ „სამგორს“ ლილოს ბაზრობასა და აეროპორტთან დააკავშირებს, ასევე მეტროს განვითარების მეორე ეტაპზე იგეგმება თბილისი-რუსთავის დაკავშირება მიწისზედა მეტროს საშუალებით. 

„ურბანული ლაბორატორიის“ ხელმძღვანელი, გიორგი ბაბუნაშვილი ამბობს, რომ პროექტი მგზავრთნაკადის სიმცირის გამო არ გაამართლებს. 

თბილისის განვითარების გენერალური გეგმის პროექტზე მუშაობა, რომელიც 2030 წლამდეა გაწერილი, 2015 წელს დაიწყო და დოკუმენტის შესაქმნელად 2 800 000 ლარი გამოიყო. დოკუმენტი თბილისის მერიას 3 იანვარს ჩაჰბარდა, თუმცა მერიას გარკვეული შენიშვნები ჰქონდა და გენგეგმა უკან დააბრუნა. საბოლოოდ „სითი ინსტიტუტმა საქართველომ" გენგეგმის გამოსწორებული ვარიანტი მერიას მაისის ბოლოს გადაუგზავნა. დოკუმენტი 2019 წლის 1 იანვრიდან ამოქმედდება.