„რუსთავის ფოლადი“ აშშ-ის ახალი რეგულაციის გამო განგაშს ტეხს და სახელმწიფოს დახმარებას სთხოვს

აშშ-ს პრეზიდენტმა დონალდ ტრამპმა, კონკურენციისგან  ქვეყნის ფოლადის მწარმოებლების დაცვის მიზნით, ფოლადის პროდუქციის იმპორტზე 25%-იანი ტარიფი დააწესა. რუსთავის მეტალურგიული ქარხნის დირექტორი აცხადებს, რომ ტარიფი საქართველოს მწარმოებლებზე ნეგატიურად აისახა, ის საფრთხეს უქმნის ქარხნის (შპს „რუსთავის ფოლადი“) უნაკერო მილების ექსპორტის პერსპექტივებს აშშ-ში და დახმარებისთვის სახელმწიფოს მიმართავს.

დარგის სპეციალისტების თქმით, ფოლადის მრეწველობა დღეს საქართველოს ეკონომიკის ერთ-ერთი მთავარი კონტრიბუტორია. განსაკუთრებით მნიშვნელოვანი გახდა მისი წილი ქვეყნის ექსპორტში, ქართული ფოლადით დამზადებული უნაკერო მილების ამერიკულ ბაზარზე გასვლის შემდეგ. ეს მილები ნავთობმოპოვებასა და მანქანათმშენებლობისთვის გამოიყენება. „რუსთავის ფოლადში“ აცხადებენ რომ ამ მილების პირველი საცდელი პარტია, ასეულობით ტონა აშშ-ში აპრილში გაიგზავნა, შეკვეთა აქვთ დაახლოებით 6 000 ტონაზე, რაც დამკვეთს ზაფხულისთვის უნდა გაუგზავნონ.

კომპანიის დირექტორის ნუგზარ კაჩუხაშვილის თქმით, ამ ექსპორტისთვის ქარხანა 2 წელზე მეტ ხანს ემზადებოდა, მიიღო ამერიკის ხარისხის სერტიფიკატი, დამყარდა კავშირი აშშ-ს დიდ დისტრიბუტორებთან, მილების პირველმა პარტიამ იქაური დისტრიბუტორების მკაცრი კონტროლის პროცედურა წარმატებით გაიარა. „დისტრიბუტორები მზად არიან რუსთავის მეტალურგიულ ქარხანას ათობით ათასი ტონა პროდუქცია შეუკვეთონ, მაგრამ, ახალი ტარიფების პირობებში, მილების აშშ-ში მიწოდება კომერციულ აზრს კარგავს“, - ამბობს კაჩიხაშვილი და აღნიშნავს რომ სახელმწიფოს მხრიდან დახმარების შემთხვევაში გამოსავალი არსებობს.

„ამერიკამ უკვე გაუწია შეღავათი თავის სტრატეგიულ პარტნიორებს - ბრაზილიას, არგენტინას, ავსტრალიას და სამხრეთ კორეას. მათ შეღავათები მისცეს, ახალი ტარიფების გათვალისწინებით. გამოსავალი იქნება, თუ საქართველოსაც, როგორც სტრატეგიულ პარტნიორს, მიეცემა ასეთივე შეღავათები და დაწესდება კვოტები გადასახადის გარეშე ექსპორტირებული პროდუქციის რაოდენობაზე. თუკი უნაკერო მილების გაგზავნა 25%-იანი ტარიფის პირობებში მოხდება ზარალი საკმაოდ დიდი შეიძლება იყოს და შესაძლოა, ეს პროგრამა საერთოდ გაჩერდეს. არადა მას რამდენიმე წლის განმავლობაში ამერიკაში ათობით მილიონი დოლარის ექსპორტის პოტენციალი აქვს.", - აცხადებს რუსთავის მეტალურგიული ქარხნის დირექტორი.

დარგის პრობლემისა და რუსთავის მეტალურგიული ქარხნის მოწოდების შესახებ ინფორმირებულია ეკონომიკის სამინისტროც და პარლამენტის დარგობრივი კომიტეტიც. მინისტრ დიმიტრი ქუმსიშვილის თქმით, მათ პრობლემაზე შეერთებულ შტატებში ვიზიტის დროსაც იმსჯელეს. დარგობრივი ეკონომიკის კომიტეტში კი აცხადებენ, რომ საკითხს ეკონომიკის სამინისტროსთან ერთად განიხილავენ.  

დონალდ ტრამპმა 8 მარტს ხელი მოაწერა განკარგულებას, რომლის მიხედვითაც, ფოლადის იმპორტზე ტარიფი 25, ალუმინზე კი 10%-იანი საბაჟო გადასახდი დაწესდა. პრეზიდენტმა ტრამპმა, ტარიფის შემოღებასთან ერთად, აშშ-ს სტრატეგიული პარტნიორების ნაწილი ამ გადასახადისგან გაათავისუფლა.
მოლაპარაკება მიმდინარეობდა კანადის, მექსიკის, ბრაზილიის, არგენტინის, ავსტრალიის, სამხრეთ კორეისა და ევროკავშირის ქვეყნებთან. 31 მაისს მოლაპარაკებები შეწყდა და შეთანხმებას მიაღწიეს ბრაზილიამ, არგენტინამ, ავსტრალიამ და სამხრეთ კორეამ, რის საფუძველზეც არსებული ტარიფის გარეშე ექსპორტირებული პროდუქციის რაოდენობაზე კვოტები დაწესდა. შეთანხმება ვერ შედგა კანადასთან, მექსიკასა და ევროკავშირის ქვეყნებთან - მათთვის ჯერჯერობით ძალაში დარჩა 25%- იანი ტარიფი. ბოლო ინფორმაციით, საპასუხო ზომებს ამერიკული პროდუქციის მიმართ ევროკავშირი ივლისიდან აამოქმედებს.