პუტინი: თუ ტრამპი ეძებს დამნაშავეს, ვის გამოც ნავთობი გაძვირდა, სარკეში ჩაიხედოს

რუსეთის პრეზოდენტმა ვლადიმერ პუტინმა ნავთობზე ფასების ზრდაზე კომენატრი გააკეთა, როგორც კრემლის ლიდერი ამბობს, პროცესების ამგვარად განვითარებაში ამერიკის შეერთებული შტატებია დამნაშავე. ამის შესახებ Bloomberg-ი წერს.

"ჰელსინკიში მე და ტრამპს ძალიან კარგი შეხვედრა გვქონდა, მაგრამ ამ თემაზე რომ გვესაუბრა, ვეტყოდი, რომ თუ მას სურს იპოვოს ის, ვის გამოც ნავთობი გაძვირდა, ამისთვის საკმარისია სარკეში ჩაიხედოს. სჯობს ამ საბაზრო პროცესებში არ ჩავერიოთ და არ ვეცადოთ პოლიტიკური ინსტრუმენტების გამოყენებით რაღაც უპირატესობის მოპოვებას“, - აღნიშნა რუსეთის პრეზიდენტმა.

ნავთობის ფასი ბოლო 4 წლის განმავლობაში ყველაზე მაღალ ნიშნულზეა. 

"როგორც ცნობილია, ნოემბრის თვიდან ძალაში ირანის წინააღმდეგ სანქციები შედის. შესაბამისად, არის მოლოდინი იმისა, რომ ირანიდან ნავთობის ექსპორტი მნიშვნელოვნად შემცირდება. უნდა ითქვას, რომ მიმდინარე ეტაპზე ინდური და ჩინური კომპანიები მასიურად აცხადებენ უარს ირანული ნავთობის შესყიდვაზე. აშშ ამ საკითხთან დაკავშირებით პრინციპულ პოზიციას ავლენს. აშშ-ის მიზანია, რომ ირანიდან ნავთობის ექსპორტი დავიდეს ნულამდე. ასევე უნდა აღინიშნოს, OPEC +-ის შეთანხმება ნავთობის მოპოვების შემცირებასთან დაკავშირებით, მიმდინარე ეტაპზე გეგმის მიხედვით ხორციელდება. თუმცა შესაძლებელია, ნავთობის ფასზე პოზიტიური გავლენა (შემცირებისკენ) მოახდინოს იმან, რომ საუდის არაბეთმა უახლოეს პერიოდში დაიწყოს ნავთობის მოპოვებისა და ექსპორტის გაზრდა ყოველდღიურად 0.5 მლნ ბარელით. თუმცა ეს დამოკიდებულია ქუვეითთან, ამ ორი ქვეყნის ნეიტრალურ ზონაში ნავთობის მოპოვების განახლებასთან დაკავშირებით, მოლაპარაკებებზე", - აცხადებენ ნავთობიმპორტიორთა კავშირში.

ნავთობის ფასების ზრდა მას შემდეგ დაიწყო, რაც ტრამპმა განაცხადა, რომ მსოფლიოს ექვს სახელმწიფოსა და ირანს შორის 2015 წელს დადებულ ბირთვულ შეთანხმებს ტოვებს და კვლავ აამოქმედებს თეირანის წინააღმდეგ ეკონომიკურ სანქციებს.