მიქაუტაძე: არასამთავრობოების ინტერესი საბჭოში მიმდინარე პროცესზე გავლენის მოხდენაა

იუსტიციის უმაღლესი საბჭოს თავმჯდომარის მოვალეობის შემსრულებელი გიორგი მიქაუტაძე ამბობს, რომ კონკრეტულ მოსამართლეებს მიზანმიმართულად დევნიან. ამის შესახებ მიქაუტაძემ ჟურნალისტებს საბჭოს სხდომის დაწყებამდე უთხრა.

მიქაუტაძის თქმით, მოსამართლეები იდევნებიან იმ გადაწყვეტილების გამო, რომელიც საბჭომ კონსტიტუციის და ორგანული კანონის „საერთო სასამართლოების შესახებ კანონის“ სრული დაცვით მიიღო. მიქაუტაძემ კიდევ ერთხელ თქვა, რომ საბჭომ უზენაესი მოსამართლეების 10-კაციანი სია პარლამენტს კანონის დაცვით წარედგინა.

"ეს არის ე.წ. შუალედური გადაწყვეტილება წარდგენის შესახებ, რომელზეც უნდა იმსჯელოს პარლამენტმა და ეს გადაწყვეტილება იქნა მიღებული ახალი კონსტიტუციის და მოქმედი კანონმდებლობის შესაბამისად", - თქვა გიორგი მიქაუტაძემ. 

მიქაუტაძე ამბობს, რომ მესამე სექტორს საბჭოში მიმდინარე პროცესებზე გავლენის ქონის სურვილი აქვთ. 

იუსტიციის უმაღლეს საბჭოში სხდომა მიმდინარეობს. ამის პარალელურად არასამთავრობო ორგანიზაციები იუსტიციის უმაღლეს საბჭოსთან აქციას მართავენ და ხელმოწერებს აგროვებენ მანიფესტისთვის „მართლმსაჯულების გადასარჩენად“.

იუსტიციის უმაღლესმა საბჭომ მოსამართლეობის მსურველ კანდიდატებთან გასაუბრება 26 ოქტომბერს დაიწყო. საბჭო 43 ვაკანტურ ადგილზე 78 კანდიდატს გაესაუბრება. ამ დროისთვის გასაუბრება უკვე 67-მა კანდიდატმა გაიარა, დღევანდელი გასაუბრების შემდეგ კი სამი კანდიდატი დარჩება.

12 იანვარს საქართველოს პარლამენტის თავმჯდომარე პარლამენტში იუსტიციის უმაღლესი საბჭოს მდივანს შეხვდა. 

კობახიძის თქმით, ორგანული კანონი დაადგენს მოსამართლეთა შერჩევის კრიტერიუმებს, კანონის ამ დებულებას ექნება უკუქცევითი ძალა და სწორედ ამ კრიტერიუმების მიხედვით იქნება წარმოდგენილი მოსამართლეთა განახლებული სია.

4 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

კანდიდატები არიან: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.

მოსამართლეთა სიამ მმართველ გუნდსა და საზოგადოებაში მწვავე კრიტიკა და დისკუსია გამოიწვია.