ბათუმის ერთ-ერთ ქუჩაზე გარევაჭრობისთვის განკუთვნილი დახლები და ჯიხურები აიღეს

ხმაური იყო ბათუმში წერეთლის ქუჩაზე, სადაც ბათუმის მერიამ გარევაჭრობისთვის განკუთვნილი დახლები და ჯიხურები აიღო.

პროცესს მოვაჭრეთა უკმაყოფილება მოჰყვა, რაც სიტყვიერ დაპირისპირებაში გადაიზარდა. მათი განცხადებით, დახლების აღების თაობაზე გაფრთხილებულები არ იყვნენ, გარევაჭრობა კი მათი შემოსავლის ერთადერთი წყაროა.

როგორც ქალაქის მერიაში განმარტეს, მოვაჭრეებს ალტერნატიულ ფართს სთავაზობენ, თუმცა მოლაპარაკებები რამდენიმე თვეა უშედეგოდ მიმდინარეობს.

"ღამით გარევაჭრობის აღკვეთის გადაწყვეტილება იმიტომ მივიღეთ, რომ დღის განმავლობაში ტრანსპორტით გადატვირთულია წერეთლის ქუჩაზე, აქვეა სკოლა და ბაღი და დახლების აღება შეუძლებელი იქნებოდა. მოვაჭრეებს რამდენიმე ვარიანტი შევთავაზეთ, დავთანხმდით მათ მიერ შეთავაზებულ ვარიანტსაც, გადაგვეყვანა ძველი ავტოსადგურის ტერიტორიაზე, ყველაფერი უსასყიდლოდ გავუკეთეთ, მაგრამ არ თანხმდებიან. ამ ქუჩაზე კი გარევაჭრობის გაგრძელება აღარ შეიძლება და აღარ დავუშვებთ", - განაცხადა თენგიზ პეტრიძემ.

გარევაჭრობის აღკვეთას წერეთლის ქუჩის მცხოვრებლები წლებია ითხოვენ. ისინი ანტისანიტარიაზე საუბრობენ. ამბობენ, რომ ტროტუარზე გავლა შეუძლებელი იყო, გარემოვაჭრეებს სკოლისა და ბაღის შესასვლელებიც ჩაკეტილი ჰქონდათ. ადგილზე სამართალდამცავები ამ დრომდე რჩებიან.

ბათუმის მერიამ გარევაჭრობის აკრძალვასთან დაკავშირებით, დღეს განცხადებაც გაავრცელა:

"წერეთლის ქუჩა და მიმდებარე ტერიტორია უკანონო გარემოვაჭრეების დახლებისგან გათავისუფლდა. გარემოვაჭრეებს საშუალება ექნებათ თავიანთი საქმიანობა მაიაკოვსკის ქუჩაზე მდებარე ავტოსადგურის ტერიტორიაზე გააგრძელონ, სადაც მათთვის 180 კეთილმოწყობილი დახლია გამოყოფილი. გარემოვაჭრეების ნაწილმა უკვე დაიწყო ახალ ლოკაციაზე საქმიანობა. ქაოტურად მოწყობილი უკანონო გარევაჭრობა მუდმივად იწვევდა სატრანსპორტო მოძრაობის გადატვირთვას და ანტისანიტარიას, რაც წერეთლის ქუჩაზე მცხოვრებ მოსახლეობას პრობლემებს უქმნიდა. ბათუმის ქუჩების უკანონო გარევაჭრობისგან გათავისუფლების მიზნით მერიამ არაერთი თანმიმდევრული ღონისძიება განახორციელა და გარემოვაჭრეებს ალტერნატიულ ტერიტორიაზე გადასვლა არაერთხელ შესთავაზა. უკანონოდ დაკავებული ტერიტორიის ნებაყოფლობით გათავისუფლებისა და მერიის მიერ შეთავაზებულ ფართში (გოგოლის ქ. #1) გადასვლის შემთხვევაში, მერია გარემოვაჭრეებს 3 თვის განმავლობაში, ყოველთვიურად, კომპენსაციის სახით 200 ლარს სთავაზობდა. ასევე შეთავაზებული იყო კეთილმოწყობილი სავაჭრო დახლები და დახურული სავაჭრო ჯიხურები, ადგილზე მისასვლელი ავტობუსის გამოყოფა და ახალი ბაზრობის შესახებ მოსახლეობის ინფორმირებაში დახმარება, რასაც გარემოვაჭრეები არ დათანხმდნენ. უკანონო გარემოვაჭრეებსა და მერიის წარმომადგენლებს შორის არაერთი შეხვედრა გაიმართა. გარემოვაჭრეებმა მაიაკოვსკის ქუჩაზე არსებული ავტოსადგურის ტერიტორიაზე გადასვლა მოითხოვეს, შემდეგ კი იქ ამაზეც უარი განაცხადეს. მერიის მხრიდან ყველა შესაძლო რესურსი იქნა გამოყენებული საკითხის გარემოვაჭრეებისთვის უმტკივნეულოდ გადაჭრისთვის, ქალაქის ინტერესების გათვალისწინებით. წერეთლის ქუჩიდან აღებული უკანონო კონსტრუქციები დასაწყობდა", - წერია განცხადებაში.