ინფრასტრუქტურის მინისტრმა 2018 წელს შესრულებული და 2019 წელს დაგეგმილი პროექტები წარადგინა

საქართველოს ვიცეპრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა წინა წელს დასრულებული და მიმდინარე წელს განსახორციელებელი პროექტების შესახებ ანგარიში წარადგინა. ინფორმაციას სამინისტრო ავრცელებს.

მაია ცქიტიშვილის განცხადებით, ქვეყანაში არსებული გამოწვევებიდან გამომდინარე, სამინისტროს საქმიანობაში განსაკუთრებით პრიორიტეტულია წყალმომარაგების, გზების, სტიქიის პრევენციის, განათლებისა და ტურიზმის ინფრასტრუქტურის, ძლიერი თვითმმართველობისა და რეგიონული განვითარების მიმართულებები.

მინისტრის განცხადებით, 2018, წელს, ჯამში, საქვეუწყებო დაწესებულებების მეშვეობითა და საერთაშორისო საფინანსო ინსტიტუტების მხარდაჭერით, 1200-ზე მეტი პროექტი დასრულდა.

სამინისტროს ინფორმაციით, საქართველოს მასშტაბით, წყალმომარაგების ქსელების მშენებლობა-რეაბილიტაციის შედეგად, სხვადასხვა მუნიციპალიტეტში 80 ათასამდე მომხმარებელი სარგებლობს გაუმჯობესებული წყალმომარაგებითა და გამართული საკანალიზაციო ქსელით. 

საგზაო ინფრასტრუქტურის მშენებლობა-რეაბილიტაციის ფარგლებში განხორციელდა 600-ზე მეტი პროექტი, მათ შორის - დამთავრდა ქობულეთის შემოვლითი გზისა და დევდორაკის გვირაბის მშენებლობა, სტიქიის შედეგად დაზიანებული წყნეთი-ბეთანიის გზის რეაბილიტაცია.

ტურისტული და მუნიციპალური ინფრასტრუქტურის მიმართულებით განხორციელდა ასამდე პროექტი, მათ შორის - აშენდა კობი-გუდაურის საბაგირო, რეაბილიტირდა თელავში ბატონის ციხე და სამუზეუმო კომპლექსი, აშენდა ოზურგეთის ფოლკლორის ცენტრი. რეგიონებში აშენდა და განახლდა საბავშვო ბაღები, მოეწყო სპორტული ინფრასტრუქტურა.

რაც შეეხება 2019 წელს, რეგიონული განვითარების სამინისტროს ინფორმაციით, წელს ცნობილი გახდება წყალმომარაგების სრული ინვენტარიზაციის შედეგები, რაზე დაყრდნობითაც განისაზღვრება წყალმომარაგების პოლიტიკა და შეიქმნება სისტემების მართვის ოპტიმალური მოდელი ყველა რეგიონისთვის. უწყების ცნობით, ამ მიმართულებით ჩატარებული სამშენებლო-სარეაბილიტაციო სამუშაოს შედეგად დამატებით 430 ათასი ადამიანი ისარგებლებს უწყვეტი, ხარისხიანი წყალმომარაგებით.

წარდგენილი ანგარიშის თანახმად, მნიშვნელოვანი სამშენებლო სამუშაოები განხორციელდება ჩქაროსნული მაგისტრალების სხვადასხვა მონაკვეთზე, გარდა ამისა - განახლდება 300 კმ გზა და აშენდება 40 ახალი ხიდი. ზემო იმერეთი-რაჭის მიმართულებით აშენდება 50 კმ-ზე მეტი სიგრძის 2-ზოლიანი საავტომობილო გზა და თბილისიდან ონში მგზავრობის ხანგრძლივობა დაახლოებით 1,5 საათით შემცირდება.

ანგარიშში წერია, რომ მთის განვითარების 2019-2023 წლების სტრატეგიის შესაბამისად უზრუნველყოფილი იქნება მაღალმთიანი დასახლებების მდგრადი განვითარება, სოციალური მხარდაჭერა და სახელმწიფო სერვისებზე წვდომა. 

არსებული ინფორმაციით, ტურისტული ინფრასტრუქტურის მიმართულებით დაგეგმილია 40-ზე მეტი პროექტი, მათ შორის - ვიზიტორთა ცენტრებისა და მუზეუმების მშენებლობა, დაცული ტერიტორიების კეთილმოწყობა. ურბანულად სრულად განახლდება აბასთუმანი, აღდგება ობსერვატორია და საბაგირო. 

ასევე, როგორც სამინისტრო აღნიშნავს, მნიშვნელოვანი ნაბიჯები გადაიდგმება ბაკურიანსა და გუდაურში სატრანსპორტო მოძრაობის და სხვა სახის პრობლემების მოსაგვარებლად. ათეულობით ტურისტულ ადგილზე დაიწყება ე. წ. გადასახედების მოწყობის პროექტი.

2019 წლის მნიშვნელოვანი პროექტია საერთაშორისო სტანდარტების პირველი რეგიონული ნაგავსაყრელის მშენებლობა, რომელიც იმერეთის, რაჭა-ლეჩხუმისა და ქვემო სვანეთის 700 000-მდე მოქალაქეს მოემსახურება.