კობა გვენეტაძე პარლამენტში მამუკა ხაზარაძის და ბადრი ჯაფარიძის მოსასმენად მივიდა

გუშინდელი განცხადების მიუხედავად, ეროვნული ბანკის პრეზიდენტი კობა გვენეტაძე პარლამენტში მაინც მივიდა. საკანონმდებლო ორგანოშიში „თიბისი ბანკის“ წარმომადგენლებს, მამუკა ხაზარაძეს და ბადრი ჯაფარიძეს უსმენენ.

პარლამენტში დარგობრივი ეკონომიკისა და ეკონომიკური პოლიტიკის კომიტეტის სხდომა დაიწყო სადაც ეროვნული ბანკის პრეზიდენტი საპარლამენტო უმცირესობის მოთხოვნით საბანკო რეგულაციების და „თიბისი ბანკის“ საკითხზე არის მოწვეული. მამუკა ხაზარაძეს და ბადრი ჯაფარიძეს მედიისთვის წინასწარი კომენტარი არ გაუკეთებიათ.

პარლამენტში უარის მიზეზები სებმა გავრცელებულ განცხადებაში განმარტა, რომელშიც ნათქვამია, რომ ეროვნულ ბანკს პარლამენტისთვის გარკვეული ინფორმაციის მიწოდება მიზანშეწონილად არ მიაჩნია, კომერციული საიდუმლოს დაცვის პრინციპისა და ბაზარზე რეგულატორის როლის მნიშვნელობის გათვალისწინებით.  

აქვე განმარტავენ, რომ ამგვარი დისკუსიებით, შესაძლოა, ზიანი მიადგეს საფინანსო სექტორის წარმომადგენლებს.

„ჩვენ გვქონდა არგუმენტები თუ რატომ სჯობდა ამ ფორმით არ განხილულიყო დღის წესრიგით წარმოდგენილი საკითხები. პირველი საკითხი არის იმ გავლენასთან დაკავშირებით, რომელიც მოსახლეობაზე შეიძლებ ჰქონდეს საბანკო რეგულაციებს.იმისთვის რომ გავაანალიზოთ რა გავლენა აქვს ამა თუ იმ რეგულაციას გარკვეული დროა საჭირო. იმისთვის რომ გავაანალიზოთ რა შედეგები აქვს რეგულაციას.ის სტატისტიკური ინფორმაცია რომელიც დღეს არსებობს არ იძლევა ღრმა ანალიზის შემოთავაზების საშუალებას. აქედან გამომდინარე ვთვლით რომ ნაადრევია ამ საკითხის განხილვას და ვფიქრობთ, რომ პირველი კვარტლის მონაცემების არსებობის შემდეგ უფრო მიზანშეწონილი იქნება ამაზე მსჯელობა“, - განაცხადა გვენეტაძემ.

„მე არ მახსოვს პრეცედენტი როცა რეგულატორის მიერ მიღებული გადაწყვეტილება ასეთი დავის საგანი ხდება“ - ამის შესახებ გვენეტაძემ კომიტეტის სხდომაზე განაცხადა.

„პირველ რიგში მე ვზრუნავ ბანკზე, ვზრუნავ ფინანსურ სექტორზე.მე ვფიქრობ რომ ასეთ სიტუაცია რეგულატორის მიერ მიღებული გადაწყვეტილების ასე განხილვა და ეჭვის ქვეშ დაყენება არის რეგულატორის დამოუკიდებლობაზე იერიშის მიტანა და გავლენის მოხდენის მცდელობა. თუ არსებობს დავები ეს დავები გადაწყდება სასამართლოს მეშვეობით. ასეთი საკითხების ამ ფორმით განხილვა გამოიწვევს მოწყვლადობის შექმნას ფინანსურ სექტორში“, - განაცხადა გვენეტაძემ.

21 თებერვალს ცნობილი გახდა, რომ „თიბისი ბანკმა" ეროვნული ბანკის წინააღმდეგ სასამართლო დავა შეწყვიტა და განაცხადა, რომ გადაიხდის ეროვნული ბანკის მიერ ჯარიმის სახით დაკისრებულ 1 მილიონ ლარს. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის. 

საქართველოს გენერალური პროკურატურა „თიბისი ბანკის საქმეზე“ უკანონო შემოსავლის ლეგალიზაციის ფაქტს იძიებს. საუბარია 17 მილიონ დოლარზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო. 

„თიბისი ბანკი“ ინგლისურ ენაზე გავრცელებულ განცხადებაში იმას წერს, რაზეც ქართულენოვანში საუბარი არაა. კერძოდ ბანკი ადასტურებს, რომ ეროვნულმა ბანკმა ერთი მილიონი ლარით დააჯარიმა.

"თიბისი ბანკმა" ეროვნული ბანკის ადმინისტრაციული აქტების ბათილად ცნობის მოთხოვნით სასამართლოში სარჩელი შეიტანა. შესაბამის განცხადებას ბანკმა საკუთარ გვერდზე გაავრცელა.