ეროვნული ბანკი ბიზნესმენების დაშანტაჟების ფაქტს უარყოფს

„თიბისი ბანკის“ საქმეზე ეროვნული ბანკი განცხადებას ავრცელებს. კომერციულ ბანკში გამოვლენილი დარღვევის ადეკვატური სანქციის გამოყენება საქართველოს ეროვნული ბანკის, როგორც საბანკო სექტორის ზედამხედველის, პირდაპირი ვალდებულება და პასუხისმგებლობაა,- განმარტავენ ეროვნულ ბანკში.

"ეროვნული ბანკის უფლებამოსილებით განსაზღვრული სანქციები დაკონკრეტებულია შესაბამის კანონმდებლობაში. ამ ჩამონათვალში არის, მათ შორის, მარეგულირებლის უფლებამოსილება, საჭიროების შემთხვევაში მოითხოვოს ბანკის ადმინისტრატორების ხელმოწერის შეჩერება და/ან თანამდებობიდან გათავისუფლება, რაც საქართველოს ეროვნულ ბანკს წარსულშიც გამოუყენებია.

შესაბამისად, არასწორია "შანტაჟად" შეფასდეს ის, რაც მარეგულირებელ ორგანოს კანონით განსაზღვრულ უფლებამოსილებას წარმოადგენს,"- წერია განცხადებაში.

მანამდე პარლამენტში საფინანსო-საბიუჯეტო კომიტეტის სხდომაზე მამუკა ხაზარაძემ თქვა, რომ საქართველოს ეროვნული ბანკი პრეზიდენტ კობა გვენეტაძის, მეშვეობით, მასსა და ბადრი ჯაფარიძეს, აშანტაჟებდა და ემუქრებოდა.

"ეროვნული ბანკი პრაქტიკულად, პირდაპირ შემიძლია, გითხრათ, მაშანტაჟებდა და გვაშანტაჟებდა მე და ბადრი ჯაფარიძეს მისი პრეზიდენტის და მისი თქვენ მიერ ახლადარჩეული მოადგილის, ვიცეპრეზიდენტის მხრიდან. მათ გამოგზავნეს წერილი, გამოუგზავნეს დამოუკიდებელ დირექტორებს.

მინდა, გითხრათ, რომ 7 წევრი ჰყავს ბანკს სამეთვალყურეო საბჭოში აქ და 9 წევრი ჰყავს ლონდონის ბირჟაზე. აქედან 5 წევრი, რომელიც საქართველოშია, არის ლონდონის ბირჟის მიერ არჩეული დამოუკიდებელი დირექტორები, რომლებსაც არანაირი კავშირი ბანკთან არ აქვთ. ერთადერთი კავშირი, რაც აქვთ, ეს არის მათი კავშირი დამოუკიდებლობასთან. ესენი არიან უცხოელები, ძირითადად. მე და ბადრის გვაქვს 2 ხმა. შესაბამისად, ვერანაირი გადაწყვეტილების უფლება ჩვენ ამ ჩვენს ბანკში არ გვაქვს და ვერც გვექნება,"- თქვა ხაზარაძემ.

მამუკა ხაზარაძე და ბადრი ჯაფარიძე პარლამენტში გასულ კვირასაც იყვნენ, თუმცა მაშინ საკომიტეტო მოსმენა ჩაიშალა. 

21 თებერვალს ცნობილი გახდა, რომ „თიბისი ბანკმა" ეროვნული ბანკის წინააღმდეგ სასამართლო დავა შეწყვიტა, ბანკმა განაცხადა, რომ ეროვნული ბანკის მიერ ჯარიმის სახით დაკისრებულ 1 მილიონ ლარს გადაიხდის. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის. 

საქართველოს გენერალური პროკურატურა „თიბისი ბანკის საქმეზე“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 28 თებერვალს პროკურატურამ გაასაჯაროვა ვიდეო სქემა, რომლითაც „თიბისი ბანკის“ საქმე აღწერა.