ჯანდაცვის სამინისტროში კორონავირუსის მართვისა და პრევენციის საკითხებზე იმსჯელეს

ჯანდაცვის სამინისტროში კორონავირუსის მართვის საკოორდინაციო კომისიის შეხვედრა გაიმართა.

როგორც ჯანდაცვის სამინისტროში აცხადებენ, შეხვედრაზე ვირუსის მართვისა და პრევენციის საკითხებზე იმსჯელეს. მთავარი აქცენტი კვლავაც პრევენციული ღონისძიებების შენარჩუნებასა და სასაზღვრო ზონებში კონტროლის გაძლიერებაზე გაკეთდა.

მინისტრის პირველი მოადგილის თამარ გაბუნიას თქმით, იგეგმება პრევენციული ღონისძიებების კიდევ უფრო გაძლიერება და დამატებითი მარაგების შესყიდვა.

„იგეგმება თერმული სკრინინგის გაძლიერება, კონტაქტების კიდევ უფრო დეტალურად გამოკვლევა და მაღალი რისკის პირების იდენტიფიკაცია. ნებისმიერი ადამიანი, მოგზაური, რომელსაც ექნება მოგზაურობის ისტორია მაღალი რისკის რეგიონებიდან, ასევე ტემპერატურის მომატება გადამისამართდება ინფექციურ საავადმყოფოში, ეს სტანდარტული პროცედურაა და რა თქმა უნდა, გაგრძელდება.

ასევე, შევაფასეთ არსებული მარაგების რაოდენობა და დაიგეგმა დამატებით მარაგების შესყიდვა, რათა სრულად იყოს ეკიპირებული ყველა ის სამსახური, ვინც მონაწილეობს უშუალოდ სამედიცინო სერვისის მიწოდებაში ან აქვს პაციენტთან უშუალო კონტაქტი“, - აღნიშნა თამარ გაბუნიამ.

მისივე თქმით, შეხვედრაზე საუბარი შეეხო სამედიცინო სერვისების მზაობას, იგეგმება პირველადი ჯანდაცვის სამსახურების მეტად გააქტიურება და მათთან ინსტრუქტაჟის გაძლიერება.

მინისტრის პირველმა მოადგილემ ისიც აღნიშნა, რომ პაციენტი, რომელსაც გუშინ კორონავირუსი დაუდასტურდა, თავს კარგად გრძნობს, მისი მდგომარეობა დამაკმაყოფილებელია, თუმცა, რჩება ექიმების მეთვალყურეობის ქვეშ.

საკოორდინაციო საბჭოს ჯანდაცვის მინისტრი ხელმძღვანელობს. მისი წევრები კი უწყების სხვადასხვა დეპარტამენტებისა და სსიპ-ების ხელმძღვანელები არიან.

საგანგებო სიტუაციების კოორდინაციისა და გადაუდებელი დახმარების ცენტრის ხელმძღვანელის, ავთანდილ თალაკვაძის თქმით, მათი ბრიგადები მთელი ქვეყნის მასშტაბითაა მობილიზებული

„ყველა სასაზღვრო პუნქტზე საჰაერო, სახმელეთო თუ საზღვაო პუნქტებზე აბსოლუტურად ყველგან მობილიზებულია ჩვენი ბრიგადები. მიმდინარეობს ყველა იმ ადამიანის სკრინინგი რომლებიც ჩაითვლებიან საეჭვოდ და ბოლო 14 დღის განმავლობაში იმყოფებოდნენ მაღალი რისკის ქვეყნებში. ყველა ბრიგადა არის მზად იმისთვის, რომ საზღვრიდანვე მოახდინონ დროული ტრანსპორტირება შესაბამის დაწესებულებაში, ეს იქნება ინფექციური საავადმყოფო თუ საკარანტინო ტერიტორია“, - განაცხადა ავთანდილ თალაკვაძემ.

საქართველოში კორონავირუსის პირველი შემთხვევა დადასტურდა. ჯანდაცვის მინისტრის, ეკატერინე ტიკარაძის თქმით, დაავადებული საქართველოს მოქალაქეა, რომელიც გუშინ აზერბაიჯანის გავლით ირანიდან შემოვიდა. საუბარია 50 წლის კაცზე. პაციენტი ინფექციურ საავადმყოფოშია გადაყვანილი და მის სიცოცხლეს საფრთხე არ ემუქრება.

26 თებერვალს ჯანმომ განაცხადა, რომ კორონავირუსის პანდემიად გამოცხადების საფუძველი ჯერ არ არსებობს.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.