რა ტიპის ტესტებით ამოწმებენ საქართველოში პაციენტებს კორონავირუსზე

რა ტიპის ტესტებით ამოწმებენ საქართველოში პაციენტებს კორონავირუსზე და რით განსხვავდება ე.წ. სწრაფი ტესტები მოლეკულური ტესტირებისგან - ამ საკითხებზე დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ტელეკომპანია „ფორმულას“ ეთერში ისაუბრა.

„კორონავირუსის დიაგნოსტირებისთვის დღეს მსოფლიოში სამი ტიპის მეთოდოლოგია არსებობს. ერთი არის PCR ტექნოლოგიაზე დაფუძნებული მოლეკულური ტესტირება, როდესაც ვირუსის აღმოჩენა ცხვირ-ხახის​ ნაცხში, სისხლში, ფეკალიებში ხდება. ეს არის რესპირაციული ვირუსების დიაგნოსტირების ე.წ. ოქროს სტანდარტი. ეს მეთოდი იძლევა საშუალებას, ძალიან ადრეულ ეტაპზე აღმოვაჩინოთ ვირუსი. ამ მეთოდს ვიყენებთ საქართველოში ლუგარის ცენტრში და კიდევ რამდენიმე ლაბორატორიაში. როდესაც ეს ტესტი იძლევა დადებით შედეგს, დიდი ალბათობით შეიძლება იმის თქმა, რომ ადამიანს ეს ინფექცია აქვს. ძალიან მაღალი დატვირთვისას ლუგარის ლაბორატორიაში თავისუფლად შეგვიძლია დღეში 400 ასეთი ტესტი ჩავატაროთ. 200-300 ტესტის ჩატარება შეუძლია თბილისის ინფექციურ ლაბორატორიას. ყველაზე დიდი დრო აქ სინჯის აღებას მიაქვს, ამას სჭირდება ტანსაცმლის გამოცვლა, უსაფრთხოების ნორმების დაცვა და ა.შ. რამდენიმე დღის წინ FDA-მ ნებართვა გასცა ისეთ PCR ტესტებზე, სადაც დიაგნოსტირების დრო 45 წუთამდე მცირდება. ეს არის ​კარტრიჯებზე დამყარებული ტექნოლოგია, რომელსაც საქართველოში ფართოდ ვიყენებთ C ჰეპატიტის და ტუბერკულოზის დიაგნოსტირებისთვის. დაავადებათა კონტროლის ცენტრს ქვეყანაში დაახლოებით 50 ასეთი აპარატი აქვს. თუ ჩვენ მალე მივიღებთ ასეთ ტესტებს, ე.წ. ოქროს სტანდარტით დიაგნოზის დასმის დრო 45 წუთამდე შემცირდება.

რაც შეეხება სწრაფ ტესტებს, არსებობს 2 ტიპის სწრაფი ტესტი. ერთი არის ანტისხეულის სისხლში აღმოჩენაზე დაფუძნებული ტესტი, სადაც ჩვენ ვეძებთ 2 ტიპის ანტისხულს, ესენია იმუნოგლობულინი G და იმუნოგლობულინი E. როდესაც ორგანიზმში შედის ინფექცია, ადამიანის ორგანიზმი ამის წინააღმდეგ გამოიმუშავებს ანტისხეულს. თუ ეს არის ანტისხეული იმუნოგლობულინი M, ეს ნიშნავს დაავადების მძიმე, მწვავე ფაზას. კორონავირუსის შემთხვევაში იმუნოგლობულინი M ჩნდება დაინფიცირების მე-5, მე-7 დღეს. შესაბამისად, ანტისხეულზე დამყარებული სწრაფი ტესტი ვერ იჭერს კორონავირუსს პირველ დღეებში, მაგრამ თუ გაჩნდა იმუნოგლობულინი G, ეს ნიშნავს, რომ ადამიანს ინფექცია გადატანილი აქვს. ეს ანტისხეული ორგანიზმში დიდხანს რჩება.

არსებობს კიდევ ერთი ტიპის სწრაფი ტესტი - ანტიგენზე დამყარებული სწრაფი ტესტი. ხდება ცხვირ-ხახის​ ნაცხის აღება და 15 წუთში​ მზად არის პასუხი, არის თუ არა ცხვირ-ხახაში ვირუსის ანტიგენი. თუმცა, მისი სპეციფიკურობა და მგრძნობელობა არის 80-85 პროცენტის ფარგლებში. ის ტესტები, რაც შეკვეთილი გვქონდა და შემდეგ სხვა ქვეყნებმა დაიწუნეს, სწორედ ანტიგენზე იყო დამყარებული. ამ ორივე ტესტს აქვს თავისი ჩვენებები. იმ შემთხვევაშიც კი, თუ ანტიგენზე დამყარებული სწრაფი ტესტი დადებით შედეგს იძლევა, ის უმეტეს შემთხვევაში მოლეკულურად უნდა გადამოწმდეს“, - განაცხადა ამირან გამყრელიძემ.

საქართველოში კორონავირუსით ინფიცირებულთა რიცხვი 83-მდე გაიზარდა. კორონავირუსისგან ჯამში 14 ადამიანი განიკურნა. ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

რა უნდა ვიცოდეთ საგანგებო მდგომარეობის შესახებ, წაიკითხეთ აქ.