მიხეილ ნინუამ საზღვარგარეთ საქართველოს საკონსულო დაწესებულებების ხელმძღვანელებთან ვიდეოკონფერენცია გამართა

საქართველოს საგარეო საქმეთა მინისტრის მოადგილემ მიხეილ ნინუამ გერმანიის ფედერაციულ რესპუბლიკაში, ესპანეთის სამეფოში, საბერძნეთის რესპუბლიკაში, პოლონეთში, ისრაელში, საფრანგეთის რესპუბლიკაში, ნიდერლანდების სამეფოში საქართველოს კონსულებთან და ფრანკფურტსა და ბარსელონაში საქართველოს გენერალურ კონსულებთან ვიდეოკონფერენცია გამართა.

ვიდეოკონფერენციის დროს განიხილებოდა მოქალაქეების სამშობლოში დაბრუნებისა და ადგილზე მათი დახმარების უზრუნველყოფის საკითხები. მინისტრის მოადგილემ კონსულებისგან მოისმინა ინფორმაცია ადგილსამყოფელ ქვეყნებში არსებული მდგომარეობის და საქართველოს მოქალაქეების საჭიროებების შესახებ. აღინიშნა, რომ საქართველოს საგარეო საქმეთა სამინისტრო საკოორდინაციო საბჭოსთან კოორდინაციით განაგრძობს მოქალაქეთა სამშობლოში ეტაპობრივი დაბრუნების პროცესს, რისთვისაც მიმდინარე წლის 27 აპრილის ჩათვლით განსაზღვრულია კომპანია Georgian Airways-ის რეისები ევროპის დედაქალაქებიდან საქართველოს მიმართულებით.

მინისტრის მოადგილემ მადლობა გადაუხადა კონსულებს და საზღვარგარეთ საქართველოს დიპლომატიური წარმომადგენლობების თანამშრომლებს COVID-19-ის გავრცელების ფონზე, ხშირ შემთხვევაში მაღალი რისკის ქვეყნებში, პროფესიული საქმიანობის ღირსეულად შესრულებისთვის.

საქართველოში კორონავირუსი 233 ადამიანს დაუდასტურდა, აქედან 54 ადამიანი უკვე გამოჯანმრთელდა, 3 კი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში აგრძელებენ მკურნალობას.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. რა უნდა ვიცოდეთ საგანგებო მდგომარეობის შესახებ, წაიკითხეთ აქ.