თენგიზ ცერცვაძემ სწრაფი და PCR-ტესტების ფუნქცია განმარტა

თენგიზ ცერცვაძემ განმარტა რა შემთხვევაში უმჯობესია სწრაფი და რა შემთხვევაში PCR-ტესტების გამოყენება. ამის შესახებ თბილისის ინფექციური საავადმყოფოს დირექტორმა „იმედის“ გადაცემაში „არენა“ ისაუბრა. მისი თქმით, საქართველო სწრაფი ტესტების შემოტანას ბაზარზე ბევრი უხარისხო პროდუქციის გამო არ ჩქარობდა, თუმცა ახლა მათ საკუთარი ნიშა აქვთ. კერძოდ, ჰქონდა თუ არა ადამიანს გადატანილი კორონავირუსი.

„PCR-ტესტი გარკვეული დროის მერე, მწვავე სტადიის გავლის შემდეგ, შეიძლება გახდეს უარყოფითი, ხოლო ის ანტისხეულები ძალიან დიდხანს რჩება და გაძლევს ინფორმაციას, რომ ამ პაციენტს ჰქონდა შეხება ვირუსთან. ანუ მას თავისი ნიშა აქვს. იდეალში, ძალიან კარგია ორივე მეთოდის გამოყენება“, - განაცხადა ცერცვაძემ.

მისივე თქმით, ანტისხეულებზე დაფუძნებული სწრაფი ტესტები სპეციალისტებს უსიმპტომო პაციენტების გამოვლენასა და ეპიდემიოლოგიური სურათის დაზუსტებაში დაეხმარება.

„ამ სწრაფი მარტივი ტესტირებით გაკეთდება გარკვეული ორგანიზებული ჯგუფების კვლევა. მაგალითად, ჯანდაცვის მუშაკების, სასწრაფო დახმარების, ექიმების, ძალოვანი სტრუქტურების, ვთქვათ ჯარის, სხვების, შესაძლოა გაკეთდეს უმაღლეს სასწავლებლებში, სტუდენტების ან სულაც შემთხვევითი კვლევა მოსახლეობაში, რომ ვნახოთ მოსახლეობის რა ნაწილს აქვს მართლაც გადატანილი ეს ინფექცია ისე, რომ ის არ მომხდარა ექიმების მხედველობის არეში. ჯერჯერობით, ასეთები ვლინდება, მაგრამ ძალიან ცოტა. ანუ რაოდენობა, ვისაც გადაუტანია ეს ინფექცია აღემატება იმ რაოდენობას, რომელიც ითვლება დადასტურებულად და გადიან მკურნალობას, მაგრამ ძალიან ცოტათი, ისე რომ ისინი ვერ მოახდენენ ეპიდემიის სცენარზე სერიოზულ გავლენას“, - აღნიშნა ცერცვაძემ.

საქართველოში კორონავირუსი 604 ადამიანს დაუდასტურდა, აქედან 240 ადამიანი უკვე გამოჯანმრთელდა. გარდაიცვალა 9 პაციენტი.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.