თამარ გაბუნია: მაღალი რისკის მოგზაურებისთვის PCR ტესტირების შესაძლებლობას განვიხილავთ

ყველა მოგზაურისთვის PCR ტესტირების შეთავაზებას ვერც ერთი ქვეყანა ვერ ახერხებს. ეს არის ძალიან რესურსტევადი და ამისი ეფექტურობა დაბალია, მაგრამ მაღალი რისკის მოგზაურებისთვის PCR ტესტირების შესაძლებლობას განვიხილავთ, - ამის შესახებ ჯანდაცვის მინისტრის მოადგილემ, თამარ გაბუნიამ საზღვრების გახსნის შესახებ საკითხის კომენტირებისას განაცხადა.

მისი თქმით, კოვიდ პასპორტს ჯანმრთელობის მსოფლიო ორგანიზაცია არ აღიარებს, რადგან კოვიდთან დაკავშირებული სტატუსი და ტესტირების შედეგი ვალიდურია 72 საათის განმავლობაში.

„საზღვრის გახსნასთან და მოგზაურების ქვეყანაში შემოსვლასთან დაკავშირებით დღესაც მიდის აქტიური მსჯელობაა. არის სხვადასხვა მექანიზმი, მაგალითად ბიზნეს მოგზაურებისთვის, რაც ასევე ითვალისწინებს PCR ტესტირებას. არის ასევე მექანიზმი მძღოლებისთვის, რომლებიც აქტიურად მუშაობენ და ბოლო დღეებში ძირითადად, იმპორტირებული შემთხვევების გამოვლენა ხდება. რა თქმა უნდა, საზღვრების უპირობო გახსნა, გარკვეულწილად, რისკის მატარებელია, თუ ეს არ ემყარება იმ ქვეყნების ეპიდსიტუაციის ძირფესვიან ანალიზს, რომელთანაც საზღვრის გახსნაზე გვექნება საუბარი.

რაც შეეხება კოვიდ პასპორტს, რაზეც არის მსჯელობა, კოვიდ პასპორტს ჯანმრთელობის მსოფლიო ორგანიზაცია არ აღიარებს, გამომდინარე იქედან, რომ კოვიდთან დაკავშირებული სტატუსი და ტესტირების შედეგი ვალიდურია ძალიან მოკლე პერიოდის განმავლობაში. მაგალითად 72 საათის განმავლობაში. ამ პერიოდის გავლის შემდეგ ამას არანაირი გარანტიის და დაცვის საფუძველი არ აქვს, ამდენად, უკეთესი მეტად მეცნიერულად დასაბუთებული დაცვა არის ნებისმიერი სიმპტომის მქონე პირის ტესტირება. ამ შემთხვევაში, როდესაც ჩვენ ვსაუბრობთ ტურიზმის გააქტიურებაზე, არის ერთი ტაქტიკა - საზღვარზე ხდებოდეს საწყისი სკრინინგი და იყოს მარტივად PCR ტესტირების შესაძლებლობა მაღალი რისკის მოგზაურებისთვის. რა თქმა უნდა, ყველასთვის PCR ტესტირების შეთავაზებას ვერც ერთი ქვეყანა ვერ ახერხებს, ეს არის ძალიან რესურსტევადი და ამისი ეფექტურობა დაბალია, მაგრამ მაღალი რისკის მოგზაურებისთვის განვიხილავთ PCR ტესტირების შესაძლებლობას და შემდეგ უკვე მზად არიან სასტუმროები, მზად არიან ტურისტული ადგილები, იმისთვის რომ მათ დახმარება გაუწიონ მოგზაურს თუ ტურისტს ოდნავ მაინც აქვს საეჭვო სიმპტომი და დააკავშირონ სამედიცინო სფეროსთან", - განაცხადა თამარ გაბუნიამ.

ქვეყანაში კორონავირუსი 963 ადამიანს დაუდასტურდა, აქედან 841 უკვე გამოჯანმრთელდა, 15 ადამიანი კი გარდაიცვალა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.