პაატა იმნაძე: მაქსიმალურად შევეცადოთ ჩვენი ცხოვრების წესი კორონას მოვარგოთ

სამწუხაროდ, ნელ-ნელა გვავიწყდება, რომ კოვიდი არსად წასულა. ის, რა სიტუაციაც გვაქვს, ამას შენარჩუნება უნდა. შენარჩუნების ერთადერთი გზა კი ის არის, რომ არ უნდა დაგვავიწყდეს - კორონა არსად წასულა, ის ჩვენ გვერდითაა, - ამის შესახებ დაავადებათა კონტროლის ეროვნული ცენტრის ხელმძღვანელის მოადგილემ, პაატა იმნაძემ „პირველი არხის“ ეთერში განაცხადა.

„ელემენტარული შეზღუდვებია დარჩენილი რაც უნდა დავიცვათ. მესმის, ძალიან ძნელია არაექიმებისთვის მთელი დღე ნიღბით სიარული, აქვე მინდა ვთქვა, რომ სულაც არაა აუცილებელი სამედიცინო ნიღბის ტარება, ე.წ. სოციალური ან საყოფაცხოვრებო ნიღაბი სრულიად საკმარისია, მთავარია ნიღაბი ჰქონდეთ.

მეც მიწევს პანაშვიდებზე სიარული, მაგრამ ნიღბის გარეშე არსად დავდივარ. ჯერ ერთი, მე ვარ რისკი და ვალდებულად ვთვლი ჩემს თავს, რომ საზოგადოებრივ ადგილებში ნიღბით ვიარო. ხელსაც არ ვართმევ, თავს დავუკრავ და ისე გავივლი“, - განაცხადა პაატა იმნაძემ.

მისი თქმით, ვირუსთან ბრძოლაში საქართველოში ყველა სამსახურმა კარგად იმუშავა და ხალხმაც მხარი აგვიბა, სხვანაირად ასეთ შედეგს ვერ მივიღებდით.

„ეს ყველაფერი თუ დაგვავიწყდა, ხედავთ სამეზობლოში რა ხდება. მაქსიმალურად შევეცადოთ ჩვენი ცხოვრების წესი მოვარგოთ კორონას. კვირა არ გავა ისე, რომ სადმე ახალი შემთხვევა არ გაჩნდეს, რომლის ინფიცირების წყარო არ ვიცით, აქედან გამომდინარე, ვირუსი სადღაც მაინც დადის“, - განაცხადა პაატა იმნაძემ.

ამ დროისთვის საქართველოში კორონავირუსის 1003 შემთხვევაა დადასტურებული, გამოჯანმრთელებულია 873 ადამიანი, 15 პაციენტი კი გარდაიცვალა.

კარანტინის რეჟიმში 5 640 ადამიანი რჩება, სტაციონარში მეთვალყურეობის ქვეშ - 244, უცხოეთიდან სამკურნალოდ გადმოყვანილია საქართველოს 31 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.