მარინა ეზუგბაია: შერეული სწავლება სკოლებისთვის ფუნქციის დასაბრუნებლად იგეგმება

ჩვენთან სიტუაცია რომ არ დამძიმდეს, ამიტომ ხდება ახალი რეგულაციების შემოღება, რომლითაც შესაძლებელი იქნება ქვეყანაში ზომიერი კონტროლირებადი მატების შენარჩუნება, - ამის შესახებ თბილისის ინფექციური საავადმყოფოს სამედიცინო დირექტორმა მარინა ეზუგბაიამ ჟურნალისტებს განუცხადა.

„იმის თქმა, რომ ჩვენთან შემთხვევები არ იქნება, ეს რა თქმა უნდა არასერიოზულია. ხომ ხედავთ ჩვენ გარეშემო ქვეყნები რა დღეში არიან. იმისთვის, რომ შევინარჩუნოთ არსებული სიტუაცია, ამისთვის ჩვენი ყველა რეგულაცია, ჩემი აზრით, სრულყოფილია. ახალ-ახალი რეგულაციები ემატება, რადგან შემდგომშიც დარჩეს ჩვენს ქვეყანაში დღეს არსებული კონტროლირებადი სიტუაცია“, - აღნიშნა მარინა ეზუგბაიამ.

მისი თქმით, შერეული სწავლება იმისთვის იგეგმება, რომ აღდგეს სწავლება და სკოლებმა ფუნქცია დაიბრუნონ. „ასეთი კონფიგურაციით, ანუ დღეგამოშვებით, გაყოფილი კლასების დასწრება სკოლაში და მეორე ნახევრის ონლაინ რეჟიმში სწავლება არის ის საშუალება, რომელიც რეგულაციებს გაამყარებს. ამ კლასებში შესაძლებელი იქნება დისტანცირება და პირბადის გამოყენების ეფექტურობაც“, - განაცხადა მარინა ეზუგბაიამ.

დღეს ჯანდაცვის მინისტრის მოადგილემ განაცხადა, რომ ფიქრობენ სწავლის შერეული მოდელზე, რომელიც გარკვეულწილად ონლაინ და საკლასო სწავლებას ითვალისწინებს.

ამ დროისთვის საქართველოში კორონავირუსის 1 010 შემთხვევაა დადასტურებული, გამოჯანმრთელებულია 885 ადამიანი, 15 პაციენტი კი გარდაიცვალა. უცხოეთიდან სამკურნალოდ გადმოყვანილია საქართველოს 41 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.