მარიან ეზუგბაიამ ივლისისა და აგვისტოს თვის კოვიდინფიცირების სტატისტიკა შეაჯამა

ივლისში გვყავდა 240 დადასტურებული შემთხვევა და ერთი დიდი, გარდაბნის კლასტერი, აგვისტოში დაგვემატა 3 ახალი კლასტერი, ეს არის: მესტიის, ქობულეთის და ყაზბეგის, მიუხედავად სამი ახალი კლასტერისა დიდი სხვაობა არ არის, 344 ახალი შემთხვევები, - ამის შესახებ ინფექციური საავადმყოფოს სამედიცინო დირექტორმა, მარინა ეზუგბაიამ ჟურნალისტებს განუცხადა.

„აგვისტოს თვეში, სამ ახალ კლასტერს არ მოჰყოლია პაციენტების ძალიან დიდი გაზრდა, რაც იმას ნიშნავს, რომ ეპიდემიოლოგიური სამსახურის მუშაობა არის ძალიან ეფექტური. ამიტომ საგანგაშო მდგომარეობა არ არის, მაგრამ ეს არ ნიშნავს რომ ჩვენ მოვდუნდეთ. ასეთი ზომიერი, კონტროლირებადი მატება რომ შევინარჩუნოთ აუცილებელი ის რეგულაციები, რაც არის უნდა შევასრულოთ. ყველამ უნდა გავაცნობიეროთ რომ პირბადის ტარება ჩვენი დაცვაა, ამიტომ სადაც ვერ ხერხდება დისტანცირება იქ უნდა გამოვიყენოთ პირბადე“, - განაცხადა მარინა ეზუგბაიამ.

ამ დროისთვის საქართველოში კორონავირუსის 1 510 შემთხვევაა დადასტურებული. განკურნებულთა რაოდენობა კი 1 253-ს შეადგენს.

უცხოეთიდან სამკურნალოდ გადმოყვანილია საქართველოს 41 მოქალაქე. კორონავირუსის შედეგად, ქვეყანაში 19 პაციენტი გარდაიცვალა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.