ეპიდემიოლოგი: COVID19-ის ახალი შემთხვევები რეგიონებში დაფიქსირებულ ე.წ მიკრო ეპიდაფეთქებებს მიეკუთვნება

„დღეისთვის არსებული მდგომარეობით, აღინიშნება კორონავირუსის შემთხვევების ზრდა. განსაკუთრებით აგვისტოს ბოლოდან და სექტემბრის დასაწყისში, თუმცა მთავარი ისაა, რომ შემთხვევების უმრავლესობის წყაროს დადგენა მოხდა“, - ამის შესახებ ინფექციური კლინიკის ეპიდემიოლოგმა ოთარ ჩოკოშვილმა განაცხადა.

მისი თქმით, ეს შემთხვევები გარკვეულად მიეკუთვნება ე.წ მიკრო ეპიდაფეთქებებს, რომლებიც დაფიქსირდა სხვადასხვა რეგიონებში და უმეტესად დასავლეთ საქართველოში.

„როდესაც დაიწყება რესპირატორული დაავადებების სეზონი, ამ პერიოდში შეიძლება მოხდეს შემთხვევების შედარებით მნიშვნელოვანი ზრდა. სწორედ ამ პერიოდისთვის გვაქვს უფრო მეტი მოლოდინები, მეტი მზაობა და მეტად უნდა მოემზადოს მოსახლეობაც.

თითოეულმა ჩვენგანმა უნდა გაითავისოს, რომ გარკვეული რისკის ქვეშ ყველანი ვართ და შევძლოთ ჩვენი რისკის მინიმუმამდე დაყვანა და ჩვენი წილი მოქალაქეობრივი პასუხისმგებლობის გამოჩენა. ახალგაზრდებს შეიძლება ამ ვირუსით დიდი საფრთხე არ შეექმნათ, თუმცა ჩვენს გვერდით არიან ადამიანები ვისაც ამ ვირუსმა შესაძლოა დიდი საფრთხე შეუქმნას“, - განაცხადა ოთარ ჩოკოშვილმა.

საქართველოში კორონავირუსის 1684 შემთხვევაა დადასტურებული. განკურნებულთა რაოდენობა კი 1315-ს შეადგენს. კარანტინის რეჟიმში იმყოფება 6020 მოქალაქე, ხოლო სტაციონარში მეთვალყურეობის ქვეშ - 299. უცხოეთიდან სამკურნალოდ გადმოყვანილია საქართველოს 41 მოქალაქე. კორონავირუსის შედეგად, ქვეყანაში 19 პაციენტი გარდაიცვალა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.