თორნიკე რიჟვაძე: როგორც კი ეპიდვითარება მოგვცემს ამის საფუძველს, ვიმსჯელებთ შეზღუდვების შემსუბუქებასთან დაკავშირებით

დღეს შეგვიძლია ვთქვათ, რომ საწოლფონდის ბრუნვა, როგორც პაციენტების გადამისამართება, მათი მკურნალობა საავადმყოფოებში, კოვიდსასტუმროებში და ბინაზე მართვა სისტემურად, მინიმალური ხარვეზებით ხდება. სწორედ რესპუბლიკური სასტუმროს გაძლიერება, მათ შორის - ადამიანური რესურსით და დღეს მიღებული გადაწყვეტილება, რომელიც ითვალისწინებს რეანიმატოლოგებისა და ინფექციონისტების პროფესიულ მხარდაჭერასა და დახმარებას აქაური გუნდის მიმართ, დაგვეხმარება, რომ განსაკუთრებით მძიმე პაციენტები იმართებოდნენ შესაბამისად, - ამის შესახებ აჭარის მთავრობის თავმჯდომარემ, თორნიკე რიჟვაძემ ტელეკომპანია „იმედის“ ეთერში, გადაცემაში „არენა“ განაცხადა.

„ჩვენთვის, რა თქმა უნდა, მთავარია ჩვენი მოქალაქეების სიცოცხლე, მათი ჯანმრთელობა. ამიტომ, არც რესურსს ვიშურებთ და თუნდაც, არაპოპულარულ გადაწყვეტილებებზე არ ვიხევთ უკან. რათა მინიმალური დანაკარგითა და სიკვდილიანობით შევძლოთ ამ გამოწვევის ღირსეულად დაძლევა. რა თქმა უნდა, ამ ყველაფერში განსაკუთრებული როლი ენიჭება საკოორდინაციო საბჭოს, პრემიერ-მინისტრის ხელმძღვანელობით. ასევე, ჩვენ ძალიან დიდ მხარდაჭერას ვგრძნობთ საქართველოს ჯანდაცვის სამინისტროს გუნდისგან. ამ კოორდინირებული მუშაობის შედეგად, რეალურად, გამოჯანმრთელებულთა რაოდენობა აღემატება დაინფიცირებულთა საერთო რაოდენობის ნახევარს. ასევე, ყოველდღიურად გვაქვს გამოჯანმრთელებულთა ახალი რაოდენობა. ჩვენ დავაკვირდებით ეპიდვითარების დასტაბილურებას და შემდეგ ვიმოქმედებთ შემზღუდავ ღონისძიებებთან დაკავშირებით. ჩვენ გვჭირდება რამდენიმედღიანი დაკვირვება, რომ შევინარჩუნოთ სტაბილური ეპიდვითარება და არ ნაადრევად არ მივიღოთ ისეთი გადაწყვეტილება, რომელმაც, შესაძლოა, მობილობა გაზარდოს და ვერ ვმართოთ სიტუაცია. ასე რომ, სიტუაციის ეფექტურად მართვა რჩება ამოცანად. როგორც კი ეპიდვითარება მოგვცემს ამის საფუძველს, ვიმსჯელებთ შეზღუდვების შემსუბუქებასთან დაკავშირებით“ - განაცხადა აჭარის მთავრობის თავმჯდომარემ.

ამ დროისთვის საქართველოში კორონავირუსის 12 841 შემთხვევაა დადასტურებული, გამოჯანმრთელებულია 6 867 ადამიანი, გარდაიცვალა 102 პაციენტი, უცხოეთიდან სამკურნალოდ გადმოყვანილია საქართველოს 41 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.