ინფექციონისტი გიორგი კანდელაკი: ვიყოთ ზომიერად ფრთხილები და ნუ დავთესავთ პანიკურ მოლოდინებს, პირადად მე ვეთანხმები პრემიერ-მინისტრის დღევანდელი პრესკონფერენციის პათოსს კოვიდის ეპიდემიასთან მიმართებაში

ვიყოთ ზომიერად ფრთხილები და ნუ დავთესავთ პანიკურ მოლოდინებს. პირადად მე ვეთანხმები პრემიერ-მინისტრის დღევანდელი პრესკონფერენციის პათოსს კოვიდის ეპიდემიასთან მიმართებაში. ვფიქრობ, რომ ძალზე პრაგმატული პოზიცია აქვს და რაც მთავარია ამ თემასთან დაკავშირებით გამოაჩინა არაპოპულარული გადაწყვეტილებების მიღების უნარი, - ამის შესახებ ინფექციონისტი გიორგი კანდელაკი საკუთარ Facebook-ზე წერს.

მისივე განცხადებით, კოლაფსის თავიდან ასაცილებლად, ნიღბების ტარების გარდა აუცილებელია, რომ მსუბუქი სიმპტომების მქონე პაციენტები არ გადიოდნენ ჰოსპიტალიზაციას და საწოლების ფონდი შევუნახოთ მათ, ვისაც ეს ნამდვილად სჭირდება.

„ამ დღეებში, ძალზე ბევრი აზრი მოვისმინე და წავიკითხე, რომლებიც არსებულ ვითარებას ან უახლესი მომავლის პროგნოზებს აპოკალიპტურ ფერებში აღწერენ. გამოითქვა მოსაზრებები, თითქოს ამჟამად იტალიის პიკის დროს დაფიქსირებულ შემთხვევებზე მეტი ფიქსირდება მოსახლეობის რაოდენობაზე გადათვლით ჩვენთან და ჯანდაცვის სისტემას გარდაუვალი კოლაფსი ემუქრება და ა.შ. რაც შეეხება რაოდენობებს, არ შეიძლება რომ ქვეყნებს შორის ინფიცირებულთა რაოდენობების პირდაპირი შედარება მოვახდინოთ.

იტალიის პიკის დროს, იტალიაშიც და მთელ ევროპაშიც, ერთ მილიონ მოსახლეზე გაცილებით ნაკლები ტესტი კეთდებოდა ვიდრე ეს ხდება დღეს საქართველოში. მაგალითად იტალიაში სადაც შემთხვევების პიკი იყო 21 მარტს, ტესტირების რაოდენობის აღრიცხვა (ყოველ შემთხვევაში ჩვენთვის რა ინფორმაციაც არის ხელმისაწვდომი) იწყება მხოლოდ ერთი თვის შემდეგ 20 აპრილიდან, როდესაც ერთ მილიონ მოსახლეზე კეთდებოდა დაახლოებით 130 ტესტი, სავარაუდოდ მანამდე იყო კიდევ უფრო ნაკლები მნიშვნელოვნად. იგივე ვითარება იყო ბრიტანეთში, სადაც, ტესტირების რაოდენობებზე ოფიციალური პირველი მონაცემები ემთხვევა ეპიდემიის პიკის დღეს 10 აპრილს, როდესაც მილიონ მოსახლეზე კეთდებოდა დაახლოებით 400 ტესტი.

საქართველოში ამჟამად, თუ შევხედავთ დაავადებათა კონტროლის ცენტრის მონაცემებს, დაახლოებით კეთდება დღეში 8000 ტესტი, რაც მილიონ მოსახლეზე არის დაახლოებით 2200. ეს ციფრი მრავალჯერ აღემატება ევროპაში ეპიდემიის პიკის დროს არსებულ ტესტირების მაჩვენებლებს და შესაბამისად გამოვლენილი შემთხვევების ერთი-ერთზე შედარება სხვადასხვა ქვეყნების სტატისტიკასთან შეუძლებელია. ასე რომ ჩვენ ამ ეტაპზე ნამდვილად არ ვაჭარბებთ იტალიის მონაცემებს და ეს შეუძლებელიც იქნებოდა, რადგან როგორც სხვადასხვა ქვეყნების სტატისტიკამ გვაჩვენა COVID-ის უკონტროლო გავრცელების ფაზაში მყოფ რეგიონებში, პირველი ტალღის დროს ინფიცირდება მოსახლეობის დაახლოებით 10-20% (სეროპრევალენტურ კვლევების მონაცემებს ვგულისხმობ, უსიმპტომო და მსუბუქი სიმპტომიანების ჩათვლით) და ჩვენ სავარაუდოდ არ ვიქნებით ამ ვითარებაში გამონაკლისები. ის ფაქტი, რომ სიკვდილიანობა ჩვენთან რჩება < 1 %, ასევე პირდაპირ მიუთითებს იმაზე, რომ ჩვენთან ამჟამად აქტიური შემთხვევების გამოვლენის გაცილებით მაღალი მაჩვენებელია, ვიდრე ევროპაში ადრეული გაზაფხულის პიკის დროს, და არა იმის გამო, რომ ჩვენი მედიცინა უფრო მაღალ დონეზე დგას ვიდრე დასავლეთის, რაც რა თქმა უნდა არასერიოზულია. ამიტომ, ეპიდემიის რეალური დინამიკის შესაფასებლად გაცილებით აკურატული მაჩვენებელია სიკვდილიანობა და არა დიაგნოსტირებული ინდივიდების რაოდენობა.

ჩვენ ამჟამად, მრავალი ევროპული ქვეყნის გამოცდილებას თუ გავითვალისწინებთ, პიკისგან გვაშორებს 2-3 კვირა (სწორედ ამ დროს მოხდება მთავარი დარტყმა სამედიცინო სისტემაზე), რომელსაც კიდევ 2 კვირაში მოჰყვება სიკვდილიანობის პიკი, რის შემდეგაც ვითარება დაიწყებს დასტაბილურებას ნელ-ნელა. რთულია ზუსტი პროგნოზირება, როგორი იქნება ნოემბრის შუა რიცხვები, თუმცა ჯერჯერობით ჰოსპიტალური სექტორის პარალიზების ნიშნები არ ჩანს. საგულისხმოა, რომ ბათუმი გადის პიკს ამჟამად და ავად თუ კარგად სისტემამ გაუძლო. გასათვალისწინებელია, რომ თბილისის რეანიმაციული საწოლების ფონდი უფრო ვრცელია, ვიდრე აჭარის არსებული რესურსები. ამიტომ ვიყოთ ზომიერად ფრთხილები და ნუ დავთესავთ პანიკურ მოლოდინებს. პირადად მე ვეთანხმები პრემიერ-მინისტრის დღევანდელი პრესკონფერენციის პათოსს კოვიდის ეპიდემიასთან მიმართებაში. ვფიქრობ, რომ ძალზე პრაგმატული პოზიცია აქვს და რაც მთავარია ამ თემასთან დაკავშირებით გამოაჩინა არაპოპულარული გადაწყვეტილებების მიღების უნარი. ჩემი მხრიდან დავამატებდი, რომ კოლაფსის თავიდან ასაცილებლად, ნიღბების ტარების გარდა აუცილებელია, რომ მსუბუქი სიმპტომების მქონე პაციენტების ჰოსპიტალიზაცია შეწყდეს (დღესაც მრავალი ასეთი პაციენტი წევს საავადმყოფოში სამწუხაროდ) და მოსახლეობას მივაწოდოთ შესაბამისი ინფორმაცია, რომ კოვიდით ინფიცირებულთა უმრავლესობას ჰოსპიტალში არაფერი ესაქმება და შევუნახოთ საწოლფონდი მათ, ვისაც ეს ნამდვილად სჭირდება“, - წერს ინფექციონისტი.

საქართველოში კორონავირუსი კიდევ 1186 ადამიანს დაუდასტურდა, 278 პაციენტი კი გამოჯანმრთელდა.

ამ დროისთვის საქართველოში კორონავირუსის 18 663 შემთხვევაა დადასტურებული, გამოჯანმრთელებულია 8338 ადამიანი, გარდაიცვალა 143 პაციენტი.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი, 23 მაისს კი, მოიხსნა საგანგებო მდგომარეობა და კომენდანტის საათიც გაუქმდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.