გიორგი გახარია: თუ ჩვენი მოსახლეობის 90% ატარებს პირბადეს, ინფიცირების გავრცელება 70%-ით მცირდება

„დღესაც გვქონდა ჩვენ საუბარი ეპიდემიოლოგებთან და იმ შემთხვევაში, თუ ჩვენი მოსახლეობის 90% ატარებს პირბადეს, ნიღაბს, ინფიცირების გავრცელება 70%-ით მცირდება“, - ამის შესახებ პრემიერ-მინისტრმა გიორგი გახარიამ მთავრობის სხდომის დაწყებამდე განაცხადა.

„დღესაც გვქონდა ჩვენ საუბარი ეპიდემიოლოგებთან და იმ შემთხვევაში, თუ ჩვენი მოსახლეობის 90% ატარებს პირბადეს, ნიღაბს, ინფიცირების გავრცელება 70%-ით მცირდება. ეს არაერთხელ გვითქვამს და კიდევ ერთხელ გავიმეორებ, რომ გლობალური პანდემიის წინააღმდეგ უფრო ეფექტიანი ინსტრუმენტი ვერ გამოიგონეს, ვიდრე ნიღაბი, სოციალური დისტანცია და ელემენტალური ჰიგიენის წესების დაცვა, ამიტომ ყველამ ერთად უნდა ვიზრუნოთ ერთმანეთზე და დავიცვათ ეს წესები. წინააღმდეგ შემთხვევაში, ინფიცირების ზრდა იქნება სწრაფი და მეტ ზიანს მიაყენებს როგორც ეკონომიკას, ასევე მოქალაქეებს. ამიტომ, უკეთ უნდა ვიზრუნოთ ერთმანეთზე, მეტი პასუხისმგებლობა გამოვიჩინოთ და პირველ რიგში უნდა ვიზრუნოთ ჩვენს მოხუცებზე, რადგან ისინი არიან რისკის-ჯგუფში“, - განაცხადა გიორგი გახარიამ.

საქართველოში კორონავირუსი კიდევ 1595 ადამიანს დაუდასტურდა, 398 პაციენტი კი გამოჯანმრთელდა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.