ამირან გამყრელიძე: ბინაზე დატოვებულ კოვიდინფიცირებულებს განსაკუთრებული მკურნალობა არ სჭირდებათ, მთავარია თითოეულ მათგანს ოჯახის ექიმთან ჰქონდეს ხშირი სატელეფონო კონტაქტი

დაავადებათა კონტროლის ცენტრის ხელმძღვანელმა, ამირან გამყრელიძემ Facebook-ის პირდაპირ ეთერში გამართულ ბრიფინგზე იმის შესახებ ისაუბრა, თუ რამდენად მიზანშეწონილია ბინაზე მყოფმა კოვიდინფიცირებულმა სხვადასხვა მედიკამენტი მიიღოს. მისი განმარტებით, სიმპტომების მიხედვითა და ექიმის დანიშნულებით, აღნიშნული მედიკამენტების მიღება აკრძალული არაა.

„ბინაზე მართვისთვის ანუ დაკვირვებისთვის, ძირითადად, რჩებიან უსიმპტომო და მსუბუქი ინფიცირებულები. რომელთაც, პრინციპში, მკურნალობა არ სჭირდებათ. ტკივილგამაყუჩებელსა თუ სიცხის დამწევს, მოგეხსენებათ, სხვა პირობებშიც ვიღებთ-ხოლმე, როცა ან კბილი გვტკივა, ან თავი, ან როცა ტემპერატურა გვიმატებს. ჩვეულებრივად, რეკომენდირებულია, თუ 38.5-ზე ზემოთ იწევს ტემპერატურა, მაშინ ვიღებთ სიცხის დამწევს. ამიტომ, ბინაზე დატოვებულ კოვიდინფიცირებულებს დიდი მკურნალობა არ სჭირდებათ, თუმცა, პირველად ჯანდაცვაში არის შესაბამისი პროტოკოლი და ჩემი ერთადერთი რჩევა იქნება, რომ კონტაქტი იქონიოთ ოჯახის ექიმთან. მოგეხსენებათ, ბოლო ერთი კვირაა, ძალიან აქტიურად ვადვოკატირებთ სლოგანს - თითოეულმა ადამიანმა იცოდეს თავისი ოჯახის ექიმის ტელეფონის ნომერი, მისი სახელი და გვარი და ამ პერიოდში, მასთან ხშირი სატელეფონო კონტაქტი გვქონდეს. ესაა მთავარი; რომ ბინაზე მყოფმა ყველა ადამიანმა პროაქტიულად დაურეკოს ხოლმე ოჯახის ექიმს. რა თქმა უნდა, ამ იზოლაციის 12 დღის განმავლობაში, ოჯახის ექიმიც აქტიურად მოიკითხავს. ესაა დღეს მთავარი და არა - ბინაზე ინტენსიური მკურნალობა. მათ ეს მკურნალობა არ სჭირდებათ, მხოლოდ და მხოლოდ, სჭირდებათ ექიმის დანიშნულებით, თუ რა სიმპტომიც გამოიხატება, მიიღოს სიცხის დამწევი, ტკივილგამაყუჩებელი თუ სხვა“, - განაცხადა ამირან გამყრელიძემ.

დღე-ღამეში საქართველოში კორონავირუსი კიდევ 1824 ადამიანს დაუდასტურდა, 1 262 პაციენტი გამოჯანმრთელდა, 23 კი გარდაიცვალა.

ამ დროისთვის საქართველოში კორონავირუსის 32 127 შემთხვევაა დადასტურებული, გამოჯანმრთელებულთა საერთო რაოდენობაა 12 632, გარდაიცვალა 238 პაციენტი. უცხოეთიდან სამკურნალოდ გადმოყვანილია საქართველოს 41 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.