მაია ცქიტიშვილი: ყველაფერი უნდა გავაკეთოთ, რომ არ გამოვიწვიოთ ჯანდაცვის სისტემის გადატვირთულობა

„ყველაფერი უნდა გავაკეთოთ, რომ არ გამოვიწვიოთ ჯანდაცვის სისტემის გადატვირთულობა“, - ამის შესახებ უწყებათაშორისი საკოორდინაციო საბჭოს წევრების ბრიფინგზე ვიცე-პრემიერმა, რეგიონული განვითარებისა და ინფრასტრუქტურის მინისტრმა, მაია ცქიტიშვილმა განაცხადა.

მისი თქმით, ამისთვის აუცილებელია, პირველადი სიმპტომების გამოვლენის შემთხვევაში, გვექნება თუ არა ტესტი გაკეთებული, თითოეულმა ადამიანმა უნდა შეასრულოს ჯანდაცვის სპეციალისტების რეკომენდაციები.

„ყველამ კარგად ვიცით უკვე ის სიმპტომები, რომლებიც მიუთითებს იმაზე, რომ თავს არ ვგრძნობთ კარგად - ყველანი უნდა გადავიდეთ თვითიზოლაციაში და დავრჩეთ სახლში. ტესტის პასუხის მიღებამდეც უნდა დავრჩეთ სახლში, შევატყობინოთ ჩვენს შესაძლო კონტაქტებს იმის თაობაზე, რომ შეიძლება ვიყოთ ინფიცირებულები და ვთხოვოთ მათაც, გადავიდნენ თვითიზოლაციაში. ასეთი გზით შევძლებთ გავწყვიტოთ ვირუსის გადაცემის ჯაჭვი, რაც ნიშნავს, რომ დაგვჭირდება მინიმალური რაოდენობის შეზღუდვები, მხოლოდ წერტილოვანი, დროებითი შეზღუდვები“, - აღნიშნა მაია ცქიტიშვილმა.

მისივე თქმით, არ იგეგმება სისტემური შეზღუდვები მთელი ქვეყნის მასშტაბით.

„იმის გათვალისწინებით, რომ ჩვენთან პოლიტიკური პროცესი ძალიან აქტიურია და გაიზარდა მობილობა, ვირუსი არ ვრცელდება მხოლოდ ცალკელ რეგიონებში, მაგალითად როგორც იყო ერთი თვის წინ, როდესაც ძირითადად, ინფიცირებულები გვყავდა აჭარაში.

დღეს ინფიცირებულთა რაოდენობა მნიშვნელოვნად გაიზარდა თბილისშიც, სამეგრელო-ზემო სვანეთშიც, კახეთშიც, გურიაშიც. ამიტომ, წერტილოვანი შეზღუდვების ფარგლებში იძულებული ვიქნებით, შევზღუდოთ მობილობა იქ, სადაც ამის საჭიროება დადგება.