ბელგიაში ლოკდაუნის რეჟიმი მომდევნო ორი კვირა ძალაში დარჩება

COVID19-ით ინფიცირების ყოველდღიური შემთხვევების შემცირების მიუხედავად, დღეს საკოორდინაციო კომიტეტმა ვირუსის სწრაფად გავრცელების შესაჩერებლად დაწესებული შეზღუდვები არ გააუქმა.

„სიტუაცია სექტემბერთან შედარებით გაუმჯობესდა, მაგრამ მაინც ძალიან მძიმეა. საკონსულტაციო საბჭომ ვითარება შეაფასა და ჩვენ შევთანხმდით, რომ ბელგია ისევ სანიტარულ-ეპიდემიოლოგიურ საგანგებო მდგომარეობაშია. დღესდღეობით არსებული მონაცემები არ გვაძლევს ყურადღების მოდუნების საშუალებას. 14 დღიანმა დაკვირვებამ გვაჩვენა, რომ ყოველდღიურად 100 000 მოქალაქეზე 1 232 ინფიცირებულია, რაც დასტურია იმის, რომ ვირუსი ისევ სწრაფად ვრცელდება. ქვეყნის მასშტაბით საავადმყოფოებში საერთო სურათი განსხვავებულია. იკლო იმ პაციენტთა რიცხვმა, ვისაც ჰოსპიტალიზირება სჭირდება. ინტენსიურ განყოფილებებში გასული კვირის შემდეგ გვაქვს პლატო. ინფიცირებულთა სიკვდილიანობა ისევ მზარდია.

გასულ კვირას საშუალოდ დღეში COVID19-ით 200 ინფიცირებული გარდაიცვალა. პარამეტრები თანახმად, 2 კვირის შემდეგაც საავადმყოფოები ისევ COVID19 -ის განგაშის მეოთხე ფაზაზე იქნებიან. ორშაბათს განახლდება სკოლებში სწავლა და გვმართებს კიდევ უფრო მეტი სიფრთხილე. საკონსულტაციო კომიტეტმა შეზღუდვების ძალაში დატოვების გადაწყვეტილება მიიღო“,- განაცხადა ბელგიის პრემიერ- მინისტრმა ალექსანდრე კრომ.

ბოლო 24 საათში ბელგიაში კორონავირუსის 5002 ახალი შემთხვევა დაფიქსირდა. გარდაიცვალა 133 ადამიანი. 13 ნოემბრის მონაცემებით, ბელგიაში აქტიურ ფაზაშია COVID19-ით ინფიცირების 475 130 შემთხვევა.

მარტიდან დღემდე გარდაიცვალა 13 891 ადამიანი. COVID19 დაამარცხა 31 372 პაციენტმა. „ყოველდღიური შემთხვევების პიკის გავლის გარდა, ბელგიაში პიკმა ჩაიარა ინტენსიურ განყოფილებებშიც. დღეს უკვე შეგვიძლია დარწმუნებით გითხრათ, რომ საავადმყოფოებში პიკი 9 ნოემბერს იყო, როდესაც ინტენსიურ განყოფილებებში პაციენტთა რიცხვმა 1 474 პაციენტი შეადგინა“,- განაცხადა კრიზისის ცენტრის წარმომადგენელმა სტივენ ვან გუხტმა.

სპეციალისტები სკოლების გახსნის პარალელურად მშობლებს მეტი სიფრთხილისკენ მოუწოდებენ და სიმპტომების გამოვლენისთანავე იზოლაციაში დარჩენას ურჩევენ.

„სკოლების გახსნა და საკლასო ოთახებში სწავლის განახლება პრიორიტეტული საკითხია. უნდა გვახსოვდეს, რომ ეს პროცესი რისკსაც შეიცავს. ბევრი მოსწავლე და მასწავლებელი დაუბრუნდება სკოლას და ამას შესაძლოა ჰქონდეს გავლენა კორონავირუსით ინფიცირების მონაცემებზე. ორი კვირის შემდეგ მივიღებთ მონიტორინგის შედეგებს. ბელგიის მაგალითზე დაკვირვება გვაჩვენებს, რომ სკოლები ვირუსის გავრცელების მთავარ წყაროს არ წარმოადგენს. სკოლებშია ის ეპიდემიოლოგიური ვითარება, რაც არის ზოგადად საზოგადოებაში. თუ ვირუსი ძალიან სწრაფად ვრცელდება მოსახლეობაში, მაშინ ჩვენ ბევრი ინფიცირებული მოსწავლე და მასწავლებელი გვყავს. ახალი პროტოკოლის თანახმად, მეორე და მესამე კლასის მოსწავლეები გაკვეთილების 50% -ს საკლასო ოთახებში გაივლიან. საათების გადანაწილებით დისტანციურ რეჟიმსაც ვინარჩუნებთ და ველოდებით მონიტორინგის მონაცემებს“,- განაცხდა ვან გუხტმა.

დღესვე მსჯელობა გაიმართა შობის დღესასწაულზე კორონავირუსით დაინფიცირების თავიდან ასაცილებლად მისაღებ ზომებზე. „შობას და ახალ წელს განსაკუთრებით ფრთხილად უნდა ვიყოთ და წესები ზედმიწევნით დავიცვათ. დღესასწაულებზე ჩვენი კონტაქტების წრე ძალიან ვიწრო უნდა იყო. უმჯობესია ეს დღეები ოჯახის წევრებთან ერთად გაატაროთ, ვისთანაც ერთ ჭერქვეშ ცხოვრობთ, რადგან რაც უფრო მეტ ადამიანს შევხდებით, მით უფრო მაღალი იქნება დაინფიცირების რისკი. მაგალითად, შობის დღესასწაული სახიფათოა. ჩვენ ერთ მაგიდასთან გვიწევს ყოფნა. ერთად ვსადილობთ და მივირთმევთ ალკოჰოლურ სასმელებს. თუ ვირუსი გავრცელებას დაიწყებს, მაშინ უკვე ახალი წლისთვის ინფიცირებულები ვიქნებით და ეს აისახება საერთო მონაცემებზე. ეს არ იქნება ისეთი შობა და ახალი წელი, როგორც ტრადიციულად გვჩვევია. საშობაოდ ეპიდემიოლოგიურ ვითარებიდან გამომდინარე დამატებით რეკომენდაციებს გავცემთ, მაგრამ დღესვე უნდა გვახსოვდეს, რომ კონტაქტების წრე არ გავზარდოთ. ასე დავიცავთ ჩვენს და ახლობლების ჯანმრთელობას“, - განაცხადა კრიზისის ცენტრის სპიკერმა ვან გუხტმა.

საკოორდინაციო კომიტეტი ბელგიაში ეპიდემიოლოგიურ ვითარებაზე 27 ნოემბერს იმსჯელებს.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.