დავით სერგეენკო: თანამშრომლობა საზოგადოებასა და სპეციალისტებს შორის, ესაა საწინდარი რომ COVID19-ის ზიანი მინიმუმამდე დავიყვანოთ

არავის არ უნდა ეწყინოს და არ უნდა გამოიყენოს პოლიტიკური მსჯელობის საგნად, რომ მთავრობა ადანაშაულებს საზოგადოებას. თანამშრომლობა საზოგადოებასა და სპეციალისტებს შორის, ესაა საწინდარი რომ COVID19-ის ზიანი მინიმუმამდე იყოს დაყვანილი, - ეს განცხადება „ქართული ოცნების“ მაჟორიტარი დეპუტატობის კანდიდატმა დავით სერგეენკომ ტელეკომპანია „იმედის“ ეთერში გადაცემა „დღის ქრონიკაში“ გააკეთა.

დავით სერგეენკოს განცხადებით, მოსახლეობის პასუხისმგებლობის საკითხი კომპლექსურია და რამდენიმე ნაწილისგან შედგება.„კერძოდ, მოსახლეობის ჩართულობისა და რეკომენდაციის გაუთვალისწინებლობის გარეშე, არანაირი ზომის მიღებას აზრი არ აქვს. საბედნიეროდ, მხოლოდ საზოგადოების ერთ, მცირე ნაწილში გაჩნდა აღქმა, რომ ეპიდემილოგები, ექიმები ან თუნდაც მთავრობა, ადანაშაულებს მათ, რომ არასწორად გაიკეთეს ნიღაბი. ეს ასე არაა, არის მოწოდება და თხოვნა, რომ შესრულდეს ეს რეკომენდაციები“, - აღნიშნა სერგეენკომ.

მისი თქმით, რეკომენდაციების დაცვისას მნიშვნელოვანია ექიმის პოზიცია და მისი დამოკიდებულება პაციენტთან მიმართებით. „არის ასეთი მოცემულობა, რომელიც შედის ექიმის კოდექსში, რომელიც ამბობს, რომ თუკი პაციენტს რაღაც აუხსენი და მიეცი რეკომენდაცია და მან ეს არ დაიცვა, ეს მისი ბრალი არაა, ამაში დამნაშავეა ექიმი, რადგან ვერ აუხსნა სწორად. ესაა ზოგადი მოცემულობა, რომელსაც ყველა კარგი ექიმი იცავს“, - აღნიშნა სერგეენკომ.

საქართველოში კორონავირუსით კიდევ 3 157 ადამიანი დაინფიცირდა, 3 230 კი გამოჯანმრთელდა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

სერგეენკოს განცხადებით, თანამშრომლობა საზოგადოებასა და სპეციალისტებს შორის მნიშვნელოვანია, რომ კორონავირუსით მიყენებული ზიანი მინიმუმამდე იყოს დაყვანილი.