როდიდან დაიწყება საქართველოში „სინოფარმით“ ვაქცინაცია

„სინოფარმით“ ვაქცინაციის დასაწყებად ჩვენ მზად ვიქნებით უკვე მომდევნო კვირიდან, თუმცა გარკვეული პერიოდი დაველოდებით ჯანმთელობის მსოფლიო ორგანიზაციის ავტორიზაციას, - ამის შესახებ ჯანდაცვის მინისტრის მოადგილემ, თამარ გაბუნიამ ბრიფინგზე განაცხადა.

მისი თქმით, საუბარია 2 კვირით დაყოვნებაზე. კერძოდ, სტატუსის მიღება დაგეგმილია აპრილის შუა რიცხვებში და საქართველოს ჯანდაცვის სამინისტროს განსხვავებული ინფორმაცია ამ ეტაპზე არ აქვს.

„დღეს ვაქცინაციის პროგრამა აქტიურად მიდის. „სინოფარმის“ გამოყენების“ სამართლებრივი საფუძვლები დღესაც არსებობს და მოქალაქეს არჩევანის გაკეთება შეუძლია, მაგრამ რადგან ჩვენი მიდგომა იყო, რომ ჯანმოს მიერ ავტორიზებული ვაქცინები გამოვიყენოთ, ვფიქრობ, მეტი ნდობა ექნება ვაქცინას მას შემდეგ, რაც ავტორიზაციას მიიღებს“, - აღნიშნა თამარ გაბუნიამ.

საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. ევროპის წამლის სააგენტოს ინფორმაციით, AstraZeneca-ს ვაქცინა უსაფრთხო და ეფექტიანი არჩევანია.

„სინოფარმის“ შესახებ უფრო ვრცელ ინფორმაციას, შეგიძლიათ ამ ბმულზე გაეცნოთ.