ეკატერინე ტიკარაძე: თუ საზოგადოების პასუხისმგებლობა იზრდება, ჩვენ შეგვიძლია ვმართოთ ეპიდემიოლოგიური სიტუაცია ისე, რომ არ გვქონდეს ძალიან მკაცრი ლოკდაუნი

ის შედეგები, რომელიც დღეს გვაქვს - ვგულისხმობ პირბადის ტარებასა და სხვადასხვა მასობრივი ღონისძიების ჩატარებას, არსებული გამკაცრებული ღონისძიებებისა და მონიტორინგის შედეგად მნიშვნელოვნად არის გაუმჯობესებული, - ამის შესახებ ეკატერინე ტიკარაძემ „ქრონიკაში“ განაცხადა. ჯანდაცვის მინისტრის თქმით, შემცირდა ინფექციის გავრცელების კოეფიციენტიც.

„შედარებით ნაკლები რაოდენობის ღონისძიება იმართება და ასევე 70%-მდე არის გაზრდილი პირბადის ტარების მაჩვენებელი, რაც რა თქმა უნდა, აისახა ინფექციის გავრცელების კოეფიციენტზე. თუ წინა პერიოდში ინფექციის გავრცელების კოეფიციენტი 1,59-მდე იყო, დღეისთვის ეს მაჩვენებელი არის 1,2. აქედან გამომდინარე, კიდევ ერთხელ ვრწმუნდებით, რომ თუ საზოგადოების დამყოლობა, თვითშეგნება და სოციალური პასუხისმგებლობა იზრდება ყველა იმ ღონისძიების მიმართ, რაც უსაფრთხო ეპიდემიოლოგიურ გავლენებს უზრუნველყოფს, ჩვენ შეგვიძლია ვმართოთ ეპიდემიოლოგიური სიტუაცია ისე, რომ ქვეყანა ისევ არ დადგეს გამოწვევის წინაშე და ისევ არ გვქონდეს ძალიან მკაცრი ლოკდაუნი და შესაბამისად, ამან არ მიაყენოს ზიანი ჩვენს ეკონომიკურ განვითარებას“, - განაცხადა ტიკარაძემ.

ამ დროისთვის საქართველოში კორონავირუსის 304 272 შემთხვევაა დადასტურებული. მათ შორის გამოჯანმრთელდა 287 029, გარდაიცვალა 4 043 პაციენტი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. 21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. ევროპის წამლის სააგენტოს ინფორმაციით, AstraZeneca-ს ვაქცინა უსაფრთხო და ეფექტური არჩევანია.