ნათია თურნავა: ტურიზმის სექტორში დასაქმებულ ადამიანებს მოვუწოდებთ, უფრო აქტიურად ისარგებლონ ვაქცინაციის პრიორიტეტული უფლებით

ეკონომიკისა და მდგრადი განვითარების მინისტრმა, ნათია თურნავამ მთავრობის ადმინისტრაციაში გამართულ ბრიფინგზე განაცხადა, რომ რეგიონებში, ვაქცინაციის დამატებითი კაბინეტების გახსნა ადამიანებს საშუალებას აძლევს, თბილისში ჩასვლის გარეშე შეძლონ იმუნიზაცია. მისი თქმით, ტურიზმის სექტორში დასაქმებულთა ვაქცინაცია ნორმალური ტემპით მიმდინარეობს, თუმცა, სასურველია, მეტი აქტიურობა იყოს.

„იმისთვის, რომ ტურიზმის სექტორში დასაქმებული ადამიანებისთვის, ვაქცინაცია უფრო კომფორტული იყოს, დაისვა საკითხი, რომ დამატებითი კაბინეტები გახსნილიყო. ჯანდაცვის სამინისტრომ გაითვალისწინა ჩვენი თხოვნა და აჭარაში, ბათუმშიც გაიხსნა დამატებითი კაბინეტი. ახლა აქტიური ტურისტული სეზონია და, რა თქმა უნდა, გვესმის, რომ ადამიანები არ უნდა მოცდნენ და დასავლეთ საქართველოდან თბილისში არ უნდა ჩამოვიდნენ. იქვეა საშუალება, რომ ვაქცინაცია გააგრძელონ. ცხადია, ვაქცინაცია ნებაყოფლობითი პროცესია. ტურიზმის სექტორში დასაქმებულ ადამიანებს მოვუწოდებთ, უფრო აქტიურად ისარგებლონ ვაქცინაციის პრიორიტეტული უფლებით. ვერ ვიტყოდი, რომ ეს პროცესი დაბალი ტემპით მიდის, ის ნორმალური ტემპით მიმდინარეობს, თუმცა, ყოველთვის შეიძლება უკეთესი“, - აღნიშნავს ნათია თურნავა.

„სინოვაკით“ ვაქცინაციის მსურველთათვის სარეგისტრაციო პორტალი კვლავ განახლდა. ამ ვაქცინის მეორე დოზა კეთდება პირველი აცრიდან 14-28 დღის შუალედში. პირველ ივნისს ჯანმრთელობის მსოფლიო ორგანიზაციამ სინოვაკის ვაქცინას მისცა გადაუდებელი გამოყენების ავტორიზაცია 18 წლის ასაკიდან.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. 21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.