თამარ გაბუნიას თქმით, საქართველო კორონავირუსის აქტიური შემთხვევების რაოდენობით ნოემბერ-დეკემბრის პიკის მდგომარეობას გაუთანაბრდა

გასული კვირის განმავლობაში შემთხვევების რაოდენობა თითქმის სტაბილურად იყო 3 000-მდე, რაც ბუნებრივია სერიოზულ ზეწოლას ქმნის ჯანდაცვის სექტორზე, - ამის შესახებ თამარ გაბუნიამ განაცხადა. ჯანდაცვის მინისტრის მოადგილემ ასევე აღნიშნა, რომ აქტიური შემთხვევების რაოდენობით ქვეყანა ნოემბერ-დეკემბრის პიკის პერიოდში არსებულ მდგომარეობას გაუთანაბრდა და ამ ეტაპზე უკვე კოვიდ-პაციენტებისთვის 6 800-მდე საწოლია მობილიზებული.

„32 ათასს გადააჭარბა აქტიური შემთხვევების რიცხვმა, მათი დაახლოებით 25% სხვადასხვა რეგიონში რჩება ჰოსპიტალში, ასევე პაციენტების უდიდესი ნაწილი ბინაზე მკურნალობს, რადგან შემთხვევების დიდი ნაწილი, საბედნიეროდ, იძლევა ამის საშუალებას და ნაწილი არის კოვიდსასტუმროებში - მათი მობილიზებაც მიმდინარეობს ყოველდღიურად. შესაბამისად, ამ პერიოდში მაქსიმალურად აქტიურია ჰოსპიტალური სექტორის, კოვიდსასტუმროების და პირველადი ჯანდაცვის მობილიზაცია. პრაქტიკულად ჩვენ უკვე კოვიდკლინიკად გადავაკეთეთ ყველა ის დაწესებულება, რომელიც პანდემიის პროცესში თავიდანვე იყო კოვიდპაციენტების მიმღები. დაემატა კიდევ ახალი კლინიკები. ასევე მაქსიმალურად არის მობილიზებული სახელმწიფო სამედიცინო ჰოლდინგის მმართველობაში არსებული სახელმწიფო კლინიკების ქსელი“, - განაცხადა გაბუნიამ.

ამ დროისთვის საქართველოში კორონავირუსის 423 843 შემთხვევაა დადასტურებული. მათ შორის გამოჯანმრთელდა 386 998, გარდაიცვალა 5 876 პაციენტი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.