ამირან გამყრელიძის თქმით, ქვეყანაში პირბადის ტარების მაჩვენებელი 53%-მდე გაიზარდა

ჩემი მთავარი რეკომენდაცია ყოველთვის გახლდათ, რომ მაქსიმალურად დავემორჩილოთ იმ რეგულაციებს, რაც დღეს ქვეყანაში არსებობს - ყველამ ვატაროთ პირბადე, დავიცვათ დისტანცია, სანიტარული წესრიგი, თავი ავარიდოთ დიდ თავშეყრებს, განსაკუთრებით სადაც სუფრა არის, იმიტომ რომ ყველაზე მეტი გავრცელება ხდება ამ ადგილებში, - ამის შესახებ ამირან გამყრელიძემ საკოორდინაციო საბჭოს მორიგი სხდომის დასრულების შემდეგ გამართულ ბრიფინგზე განაცხადა.

დაავადებათა კონტროლის ცენტრის დირექტორმა აღნიშნა, რომ ქვეყანაში პირბადის ტარების მაჩვენებელი გაიზარდა.

„ცოტა მიხარია, რომ ბოლო მონაცემებით [პირბადის ტარების მაჩვენებელი] 53%-ზე არის ასული. ანუ, ხალხი ოდნავ შეშინდა, ვიგრძენით, რომ პირბადეს მართლა აქვს დაცვა. 53%-დან თუ 80-სა და 90-ზე ავალთ, კიდევ უფრო შედარებით მშვიდად გადავიტანთ ამ ტალღას“, - განაცხადა გამყრელიძემ.

ორი კვირის წინ, ამირან გამყრელიძე ამბობდა, რომ ქვეყანაში პირბადის ტარების მაჩვენებელი მხოლოდ 35%-ია, დეკემბერში კი პირბადეს მოსახლეობის მხოლოდ 28% იყენებდა.

დღეს საქართველოში კოვიდინფიცირების 15 762 ახალი შემთხვევა გამოვლინდა, რაც პანდემიის დაწყებიდან ყველაზე მაღალი მაჩვენებელია.

ამ დროისთვის საქართველოში კორონავირუსის 1 075 154 შემთხვევაა დადასტურებული. მათ შორის გამოჯანმრთელდა 972 745, გარდაიცვალა 14 774 პაციენტი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.