თეა წულუკიანი: იმედი მაქვს, ICOMOS-ის დასკვნა წერტილს დაუსვამს ხელოვნებათმცოდნეების მცირე ჯგუფის პოლიტიკურად ანგაჟირებულ დისკუსიას იმის შესახებ, რომ ჩვენ არაფერი ვიცით

იმედი მაქვს, ICOMOS-ის გუშინდელი დასკვნა წერტილს დაუსვამს ხელოვნებათმცოდნეების მცირე ჯგუფის პოლიტიკურად ანგაჟირებულ დისკუსიას იმის შესახებ, რომ ჩვენ არაფერი ვიცით და ა.შ., - ამის შესახებ თეა წულუკიანმა გადაცემაში „იმედი LIVE“ განაცხადა. კულტურის მინისტრის თქმით, გელათში ჩატარებული გადაუდებელი ღონისძიებების შედეგად კედლის მხატვრობის ფრაგმენტები გადარჩა. მინისტრმა ICOMOS-ის ჯგუფის წევრების მაღალ პროფესიონალიზმსაც გაუსვა ხაზი და აღნიშნა, რომ მათთან კომუნიკაციის შემდეგ, სამინისტრო საზოგადოებას სამუშაოების ახალი ეტაპის შესახებ ინფორმაციას 1 თვის თავზე მიაწვდის.

წულუკიანმა ასევე მის მიმართ გაჟღერებულ ბრალდებებს უპასუხა.

„მინდა ყველას შევახსენო, რომ გელათში 2021 წლიდან, მას შემდეგ რაც კულტურის სამინისტრო შეიქმნა, წყალი არ ჩადის. ეს ICOMOS-ის დასკვნაშიც არის ნათქვამი და 2008 წელს შემუშავებული რეაბილიტაციის პროექტი 2020 წლამდე ხორციელდებოდა. შესაბამისად, მე ვერც იუსტიციის სამინისტროდან და ვერც პარლამენტიდან, ძალიანაც რომ მნდომოდა, გელათში ხარვეზებს ვერ დავუშვებდი. ჩემი საქმე არის ამ ხარვეზების გამოსწორება და არ დავმალავ კმაყოფილებას და ვიტყვი, რომ გუშინდელი დასკვნით ვარ გახარებული, რომ ჩვენი სტრატეგია სწორია“, - განაცხადა წულუკიანმა.

9 თებერვალს, კულტურის სამინისტრომ მიიღო ICOMOS-ის შეფასებები, რომელთა მიხედვითაც, გელათის კედლის მხატვრობაზე ჩატარებული ზემოხსენებული გადაუდებელი სამუშაოები და სახურავის მოწყობასთან დაკავშირებით განხორციელებული კვლევები და სამომავლო რეკომენდაციები დადებითად შეფასდა.