თბილისის სათამაშოებისა და თოჯინების 80-წლიანი სამუზეუმო კოლექცია თბილისის საკრებულოს შენობაში დაიდებს ბინას

თბილისის მუზეუმების გაერთიანების სათამაშოებისა და თოჯინების მუზეუმი თბილისის მუნიციპალიტეტის საკრებულოს შენობაში დაიდებს ბინას. სათამაშოებისა და თოჯინების მუზეუმი საბავშვო მწერლისა და პედაგოგის - თინათინ თუმანიშვილის თაოსნობითა და საქართველოს მთავრობის საგანგებო გადაწყვეტილებით, 1937 წელს, ათარბეგოვის ქუჩაზე, საბავშვო ბაღის შენობაში დაარსდა.

მუზეუმი 1958 წელს მოსწავლე ახალგაზრდობის (მაშინდელ პიონერთა) სასახლეში გადავიდა, 1986 წლიდან, შავთელის ქუჩაზე მდებარე შენობაში განთავსდა, 2012 წლიდან კი, დამთვალიერებლებლთან და უამრავ მნიშვნელოვან ექსპონატთან ერთად, ახალ შენობას ელოდებოდა.

დღეისთვის, მუზეუმს, განთავსდება რა, თბილისის ცენტრში, საკრებულოს ისტორიულ შენობაში, შემეცნებითი თვალსაზრისით მნიშვნელოვანი დატვირთვა ექნება როგორც ახალგაზრდა თაობისთვის, ისე - დედაქალაქის სტუმრებისათვის.

მუზეუმის კოლექციაში დაცულია მხატვრული დედოფალები, მოძრავი მუსიკალური სათამაშოები, ეთნოგრაფიულ და თანამედროვე თემაზე შექმნილი სათამაშოები, მსოფლიოს სხვადასხვა ქვეყნის დედოფალები, ფერწერული ტილოები, ხის ექსპონატები, იშვიათი წარმოების ავეჯი, საავტორო თოჯინები, სახვითი და გამოყენებითი ხელოვნების ნიმუშები, ნაქარგობების იშვიათი კოლექცია და სხვა. მუზეუმთან, წლების განმავლობაში, აქტიური ურთიერთობა ჰქონდათ ცნობილ მხატვრებს, მწერლებს, მეცნიერებსა და საზოგადო მოღვაწეებს: ლადო გუდიაშვილს, ელენე ახვლედიანს, ვალერიან სიდამონ-ერისთავს, მოსე თოიძეს, უჩა (ილია) ჯაფარიძეს, სიმონ ჯანაშიას, ვერა ბარდაველიძეს, ევგენი ხარაძეს, შალვა დადიანს, იოსებ გრიშაშვილს, ლეო ქიაჩელსა და სხვებს.

მუზეუმის ფონდში დაცულია სხვადასხვა ტიპის ტიპოლოგიური მასალა და ავტორთა ნამუშევრები, მათ შორის: ქართული ხალხური დედოფალები, ეთნოგრაფიული მასალა, ელენე ახვლედიანის, ლადო გუდიაშვილის, ავთო ვარაზის, ნინო ბრაილაშვილის, ნინო ბელიაევას, რაფიელ ბეგთაბეგიშვილის, თამარ კვესიტაძის, ირმა ქააძის, ანა გაბრიაძის და სხვათა ნამუსევრები, ასევე მექანიკური და მუსიკალური საკრავები, ჩინური, იაპონური, ფრანგული, გერმანული და სხვადსხვა ქვეყნის საკოლექციო თუ საავტორო კოლექციები.

თბილისის საკრებულოს ისტორიულ შენობაში თოჯინებისა და სათამაშოების მუზეუმისთვის გამოყოფილი ტერიტორიის პროექტირება წელს დაიწყება.

შემდეგი 2023 წლის ბიუჯეტში კი მუზეუმის მოწყობის ხარჯები იქნება გათვალისწინებული. მუზეუმი მთლიანად იქნება ადაპტირებული და ხელმისაწვდომი სხვადასხვა საჭიროების ადამიანებისთვის.

თოჯინებისა და სათამაშოების მუზეუმი თანამედროვე მუზეუმისთვის საჭირო მოთხოვნებს უპასუხებს.