ორსონ უელსის უკანასკნელი ფილმი რეჟისორის გარდაცვალებიდან 33 წლის შემდეგ აჩვენეს

ვენეციის კინოფესტივალზე აჩვენეს ამერიკელი რეჟისორის ორსონ უელსის უკანასკნელი ფილმი „ქარის მეორე მხარეს“. რეჟისორი 1985 წელს გარდაიცვალა და ფილმზე მუშაობა ვერ დაასრულა. 33 წლის შემდეგ ის როგორც იქნა დაამონტაჟეს და გამოაქვეყნეს; ნოემბერში მისი ნახვა შესაძლებელი იქნება Netflix-ზე. კრიტიკოსების აზრით „ქარის მეორე მხარეს“ კინოს ისტორიაში შევა არა იმდენად ფილმის ღირსებების გამო, არამედ მისი შექმნის საინტერესო ისტორიით. 

ორსონ უელსმა „ქარის მეორე მხარე“ სრულად გადაიღო და ნაწილობრივ დაამონტაჟა კიდეც, მაგრამ პროდიუსერებთან და დაფინანსებასთან დაკავშირებული პრობლემების გამო ფილმმა დღის სინათლე ვერ იხილა ვერც რეჟისორის ცხოვრებაში და ვერც მისი გარდაცვალებიდან 30 წლის განმავლობაში. 

1970 წელს, იმ დროს უკვე კინოს ისტორიაში უდიდეს რეჟისორად აღიარებულმა უელსმა (ამ ტიტულისთვის საკმარისი გახდა მისი სადებიუტო ფილმი „მოქალაქე კეინი“) ევროპიდან ჰოლივუდში ფილმის გადასაღებად გადაწყვიტა დაბრუნება. ფილმი გადაიღო, თუმცა რეჟისორის დიდი ძალისხმევის მიუხედავად მისი დასრულება არავინ დააფინანსა. ლეგენდის თანახმად, უელსმა ფილმის დამთავრების პირობა ჩამოართვა თავის მოსწავლეს და უმცროსს მეგობარ პიტერ ბოგდანოვიჩს, რომელიც იმ დროს უკვე ასევე ცნობილი რეჟისორი იყო. ამავდროულად ბოგდანოვიჩი ფილმში ერთ-ერთ მთავარ როლს თამაშობს.

„ქარის მეორე მხარეს“ მთავარი სიუჟეტი ფსევდოდოკუმენტურად გადაღებული გამოგონილი რეჟისორის 70 წლის იუბილეა. ეს რეჟისორი ჯეიკ ჰანაფორდია, რომლის როლსაც მსახიობი ჯონ ჰიუსტონი თამაშობს. ეს პერსონაჟი თავად უელსმა მოიგონა და ნაწილობრივ ის შთაგონებულია ერნესტ ჰემინგუეის ცხოვებით და ბედისწერით. ჰანაფორდი თავისი ესპერიმენტული, არტჰაუსური ფილმით ჰოლივუდის გაოცებას გეგმავს. პირველი სეანსი მეგობრებისთვის დაბადების დღის აღნიშვნას ეძღვნება; სცენები უელსის გადაღებული ფილმიდან სანახაობის სულ ცოტა მესამედს მოიცავს. იმავე ღამეს ჰანაფორდი ავტოავარიაში იღუპება. 

ჰანაფორდის ირგვლივ თავმოყრილია უამრავი ადამიანი - მისი მოსწავლეები, თაყვანისმცემლები, მეგობრები, ნაცნობები და პარაზიტები. ასევე რამდენიმე ლილიპუტი და მანეკენების მცირე არმია, რომლებიც მთავარი გმირის მიერ გადაღებულ ვარსკვლავს განასახიერებენ - ფილმის მსვლელობისას მათ ხვრეტენ.

კრიტიკოსები წერენ, რომ უელსმა „ქარის მეორე მხარეს“ ჩაიფიქრა როგორც მწარე, ბოროტი და უკომპრომისო კომედია, მაგრამ კომედია გარდაიქმნება დრამად და ფილმს არ აქვს ის ხიბლი და დინამიკა, რომელიც უელსის ყველაზე წარუმატებელ ფილმებსაც ახსიათებს. ის მონოტონური, ქაოტური და ადგილებში სრულიად გაუგებარია, მიუხედავად იმისა, რომ ჩანაფიქრის რადიკალიზმი ერთი შეხედვითაც თვალშისაცემია. ვისი ბრალია ეს, რეჟისორის, ბოგდანოვიჩის და მურავსკის, რომლებმაც მისი ჩანაფიქრი არასწორად „თარგმნეს“ თუ ფილმი უბრალოდ მოძველდა? სპეციალისტები ამბობენ, რომ ამ კითხვებზე ცალსახა პასუხი სავარაუდოდ არ არსებობს.

თუმცა ეს არ ნიშნავს იმას, რომ „ქარის მეორე მხარეს“ არ უნდა დაესრულებინათ. კინოკრიტიკოსები აღნიშნავენ, რომ ეს არის კვლევისთვის უაღრესად საინტერესო არტეფაქტი და ისტორიკოსებს და კინოს თაყვანისმცემლებს 2018 წელი სწორედ ამ აღმოჩენის წყალობით დაამახსოვრდებათ.

ვენეციის კინოფესტივალი 29 აგვისტოს გაიხსნა და გამარჯვებულებს 8 სექტემბერს გამოავლენს.