კევინ სპეისიმ ფრენკ ანდერვუდის სტილში ვიდეომიმართვა გამოაქვეყნა

24 დეკემბერს მასაჩუსეტსის შტატის პროკურატურამ განაცხადა, რომ ჰოლივუდის მსახიობის კევინ სპეისის წინააღმდეგ სასამართლო პროცესი დაიწყო, რომელიც თავდასხმასა და ცემას შეეხება. 

სასამართლოს პირველი სხდომა 20 დეკემბერს გაიმართა, სპეისის კი ოფიციალურად ბრალს 7 იანვარს წაუყენებენ. 

საბოლოო ჯამში, მსახიობს სექსუალურ ძალადობასა და შევიწროებაში 30-ზე მეტი კაცი ადანაშაულებს. კევინ სპეისის გარშემო სექს-სკანდალი გასული წლის 30 ოქტომბერს აგორდა, როდესაც მსახიობმა ენტონი რაპმა ჰოლივუდის ვარსკვლავი სექსუალურ შევიწროებაში დაადანაშაულა. სპეისიმ განაცხადა, რომ ფაქტი არ ახსოვს, მაგრამ ბოდიში მოიხადა და აღიარა, რომ ჰომოსექსუალია.

ამ ამბიდან მალევე, კომპანია Netflix-მა სერიალ "ბანქოს სახლის" ბოლო, მე-6 სეზონის გადაღება შეაჩერა. 4 ნოემბერს ცნობილი გახდა, რომ სპეისი სერიალის გადაღებებიდან მოხსნეს.

ამასთან, ამერიკულმა სატელევიზიო პრემია Emmy Award-მა გადაწყვიტა, რომ კევინ სპეისისთვის კინოინდუსტრიაში შეტანილი შემოქმედებითი წვლილისთვის "2017 წლის საპატიო ემის" აღარ გადაეცა.

ბრალდების შესახებ ცნობის გავრცელების შემდეგ კევინ სპეისიმ 3-წუთიანი ვიდეორგოლი გამოაქვეყნა, სახელწოდებით Let me be Frank, რაც ორნაირად ითარგმნება: „ნება მომეცით, ვიყო ფრენკი“ და „მოდი, ვიქნები გულახდილი“.

ვიდეორგოლში მან პრეზიდენტ ფრენკ ანდერვუდის როლს მოირგო. 2017 წლის შემოდგომის შემდეგ ეს სპეისის პირველი საჯარო მიმართვა გახდა.

ვიდეოში სპეისი ანდერვუდის სახელით ლაპარაკობს სერიალში განვითარებულ მოვლენებზე.

„ზოგიერთებმა გავრცელებული ხმები დაიჯერეს და მოუთმენლად ელოდნენ, როდის ვაღიარებდი ყველაფერს. ისინი ყველაფერს მისცემდნენ, რომ ჩემგან მოესმინათ, რომ სამართლიანად დავისაჯე. განა ეს ადვილი არ იქნებოდა? დასკვნები შესაძლოა ისეთი მატყუარა იყოს, გენატრებოდით?"- ამბობს სპეისი ვიდეორგოლში.