პარიზში სახლის რემონტის დროს მე-17 საუკუნის ნახატი იპოვეს

2017 წელს, მოდის სახლ Oscar de la Renta-ს აღმასრულებელმა დირექტორმა ალექს ბოლენმა ახალი ბუტიკისთვის პარიზში შენობა იპოვა, კერძოდ, ელისეს მინდვრებთან ახლოს, მარინიანის ქუჩაზე ორი სართული მე-19 საუკუნის შენობაში. მანამდე მეორე სართულს ბროკერული კომპანია ქირაობდა, ამიტომ შენობა გამოიყურებოდა როგორც ტიპური ოფისი დაკიდული ჭერით. ბოლენმა კაპიტალური რემონტის გაკეთება გადაწყვიტა, - წერს ამერიკული The New York Times-ი. 

დაკიდული ჭერის დემონტაჟისას, მეორე სართულის ერთ-ერთ ოთახში, მუშებმა მე-19 საუკუნით დათარიღებული ხის პანელები იპოვეს, რომელზეც ჰერალდიკური სიმბოლოები იყო გამოსახული. ეს საინტერესო, მაგრამ ძველი შენობისთვის დამახასიათებელი აღმოჩენა გახლდათ. გაცილებით მოულოდნელი აღმოჩნდა 3x6 მეტრზე მოცულობის ნახატი, რომელიც მუშებმა კედლის პანელების ქვეშ იპოვეს. ტილო ასახავდა მე-17 საუკუნის მოდის თანახმად ჩაცმულ სამეფო კარის წევრებს, რომლებიც იერუსალიმში შედიოდნენ.

არქიტექტორმა ნატალი რაიანმა, რომელიც Oscar de la Renta-ს პარიზული ბუტიკის ინტერიერზე მუშაობდა, ალექს ბოლენს ნახატის სანახავად ნიუ-იორკიდან პარიზში ჩასვლა სთხოვა. თავის მხრივ ბოლენმა აღმოჩენის შესაფასებლად ხელოვნების ისტორიკოსი სტეფან პინტი მიიწვია, რომელმაც დაადგნა, რომ ნახატი 1674 წელს მხატვარმა არნო დე ვუეზმა შექმნა. ის ვერსალის ავტორის, ლუდოვიკ XIV-ს კარის მხატვრის, შარლ ლერენის მოსწავლე იყო. დე ვუეზი მეფის მიერ აკრძლულ დუელებში მონაწილეობდა, რის გამოც საფრანგეთი დატოვა და კონსტანტინეპოლში გადასახლდა. სურათზე მან ოსომალეთის იმპერიაში საფრანგეთის ელჩი შარლ ოლივიე დე ნუანტელი და მისი თანმხლები სამეფო კარის წარმომადგენლები გამოსახა.    

ვინ ამოქოლა კედელში ნახატი, უცნობია. შეიძლება ის მეორე მსოფლიო ომის დროს დამალეს. ერთი რამ ცხადია, რომ ტილო კედელზეა მიკრული და დაზიანების გარეშე მისი მოხსნა შეუძლებელია. ბოლენი შენობის მფლობელებს შეხვდა, ნახატის შესახებ უამბო და მათ Oscar de la Renta-ს ხარჯზე ნამუშევრის რესტავრაცია ერთი პირობით შესთავაზა - ის დარჩება კედელზე, ვიდრე მოდის სახლი იმუშავებს შენობაში, სადაც ის იპოვეს (იჯარის თავდაპირველი შეთანხმება 10-წლიანია). მესაკუთრეები ამ პირობას დათანხმდნენ.

ნახატის რესტავრაცია 2018 წლის ნოემბერში დაიწყო და სავარაუდოდ, მაისში დასრულდება. ნამუშევრის აღდგენისთვის ალექს ბოლენმა თითქმის ნახევარი წლით, გაზაფხულის ბოლომდე, გადადო ბუტიკის გახსნა.

The New York Times-ი ნამუშევრის სავარაუდო ფასსაც არ ასახელებს. ნახატის უსაფრთხოებისთვის ბუტიკის დაცვას გააძლიერებენ, მეორე სართულზე კი ფანჯრებში განსაკუთრებულ შუშებს ჩასვამენ. მართალია ტილოს ავტორი ძალიან ცნობილი მხატვარი არ არის, მაგრამ ისტორიკოსები დარწმუნებულები არიან, რომ ნამუშევრის შენახვის ხარისხის და ზომის გამო, ტილო „იშვიათი, განსაკუთრებული აღმოჩენაა“.