მედია: რუსეთი სავარაუდოდ გერმანიის საპარლამენტო არჩევნებში ჩაერია

ცენტრმა დოსიემ, ჟურნალ Der Spiegel ტელეკომპანია ZDF(გერმანია), კორპორაცია BBC (დიდი ბრიტანეთი) და გაზეთ La Repubblica-სთან (იტალია) ერთად დაადგინა, რომ რუსეთის ხელისუფლება სავარაუდოდ შეეცადა გერმანიის საპარლამენტო არჩევნებში ჩარევას 2017 წელს.

ჟურნალისტების მიერ მოპოვებული მასალების მიხედვით, სულ მცირე ერთ რჩეულ დეპუტატს, მარკუს ფრონმაიერს, რომელიც მემარჯვენე პარტია „ალტერნატივა გერმანიისთვის“ წარმოადგენს, ჰქონდა რუსეთის მხარდაჭერა. პარტიაზე „ალტერნატივა გერმანიისთვის“ უკვე დიდი ხანია ეჭვობენ, რომ რუსეთის მიმართ სიმპათია აქვს, მათ შორის იმიტომ, რომ მისი წარმომადგენლები აკრიტიკებენ დასავლეთის სანქციებს. ახალი გამოძიება შეიძლება პირველი მტკიცება იყოს იმისა, რომ „ალტერნატივას“ და მოსკოვს კავშირები აქვთ. 

ჟურნალისტების ხელში რუსეთის სახელმწიფო დუმის დეპუტატის ვიქტორ შრეიდეირს დამხმარე, პეტრე პრემიაკის წერილი მოხვდა. ეს წერილი 2017 წლის 3 აპრილს არის გაგზავნილი და ბუნდესტაგის არჩევნებს ეხება. მარკუს ფრონმაიერს მასში კანდიდატს უწოდებენ, რომელსაც პარლამენტში გასვლის დიდი შანსები აქვს და მას მხარდაჭერა სჭირდება.  პრემიაკი აღნიშნავს, რომ „ბუნდესტაგში იქნება ჩვენი, აბსოლუტურად კონტროლირებადი დეპუტატი“. მისი დახმარებით არაკომერციული ორგანიზაციის გახსნა იგეგმებოდა, „რისი საშუალებითაც რუსული ნარატივის ლობირება იქნება შესაძლებელი“.

წერილის ადრესატი, ცენტრ „დოსიეს“ ცნობით, სავარაუდოდ სერგეი ალექსანდროვიჩ სოკოლოვი იყო. დღეს ის სავარაუდოდ მუშაობს პრეზიდენტის საგარეო პოლიტიკის მართვის კომიტეტში. მის სფეროში შედის კრემლის პროექტები, რომელიც დაკავშირებულია საერთაშორისო პოლიტიკასთან და ფინანსებთან. „დოსიეს“ ცნობით, სოკოლოვს წერილი ვინმე ალექსანდრ ლეონიდოვიჩზე უნდა გაეგზავნა, ეს კი შეიძლება ალექსანდრე ლეონიდოვიჩ მანჟოსინია - 2004-2018 წლებში სოკოლოვის ხელმძღვანელი.

BBC აღნიშნავს, რომ არ არსებობას მტკიცებულება იმისა, რომ კრემლმა პრემიაკის წერილში განმარტებული რჩევები გაითვალისწინა ან რაიმე სახის მატერიალური დახმარება გაუწია ფრონმაიერს. ამასთან, ჟურნალისტებს კიდევ ერთი წერილი აქვთ, რომელიც შესაძლოა ბუნდესტაგის ამავე არჩევნებს შეეხებოდეს. „მატერიალური დახმარების გარდა, მედიაში გაშუქება გვჭირდება. ნებისმიერი ინტერვიუ ან რეპორტაჟი რუსულ მედიაში, შეიძლება ჩვენთვის სასარგებლო აღმოჩნდეს“. წერილი ფრონმაიერის საარჩევნო შტაბის სახელზეა დაწერილი. ზუსტად ვის გაუგზავნეს ეს წერილი, უცნობია. 

ფრონმაიერმა წერილს ყალბი უწოდა, ხოლო პრემიაკის თქმით, არ ახსოვს თუ მსგავსი რამე გაეგზავნოს. 

ბუნდესტაგის არჩევნებში, გერმანიის სოციალურ-დემოკრატიულმა პარტიამ ხმების 20,5% მიიღო, თავისუფალ დემოკრატიულ პარტიას ამომრჩევლების 10,7%-მა დაუჭირა მხარი, ხოლო მემარჯვენეპოპულისტურმა „ალტერნატივა გერმანიისთვის“ - 12, 6%. ბუნდესტაგის არჩევნებში  ქრისტიანულ-დემოკრატიულმა კავშირმა და ქრისტიან-სოციალურმა კავშირმა ახალი მოწვევის ბუნდესტაგში 246 მანდატი მოიპოვა.