ფინეთის საპარლამენტო არჩევნებში სოციალ-დემოკრატები ლიდერობენ

ფინეთის საპარლამენტო არჩევნებში წინასწარი მონაცემებით სოციალ-დემოკრატები ლიდერობენ. ქვეყნის მასშტაბით თითქმის 4.5 მილიონმა ადამიანმა პარლამენტის წევრები აირჩია. ამის შესახებ ინფორმაციას Deutsche Welle ავრცელებს.

ბიულეტენების 35.5%-ის დათვლის შედეგად, არჩევნებში სოციალ-დემოკრატიული პარტია 18.9%-ით ლიდერობს, მეორე ადგილზე კონსერვატიული ეროვნული კოალიციაა 17.2%-ით. ლიბერალურ პარტია "ფინეთის ცენტრს", რომელსაც პრემიერმინისტრის მოვალეობის შემსრულებელი იუჰა სიპილა ხელმძღვანელობს, 15.4% აქვს; ხოლო მემარჯვენე-პოპულისტურ პარტია "ნამდვილ ფინელებს"  - 15.1%. 

წინასწარი შედეგებით ირკვევა, რომ შესაძლოა ფინეთს, ბოლო 20 წლის განმავლობაში პირველად, მემარცხენე პრემიერი ჰყავდეს.

ქვეყნის პარლამენტის 200 წევრს ოთხწლიანი ვადით აირჩევენ. არჩევნებში 19 პარტიიდან 2468 კანდიდატი  მონაწილეობდა.