უკრაინის პრეზიდენტის სპიკერი: ადმინისტრაცია სააკაშვილისთვის ოფიციალური პოზიციის შეთავაზებას არ განიხილავს

უკრაინის პრეზიდენტის სპიკერის, იულია მენდელის განცხადებით, ზელენსკის ადმინისტრაცია მიხეილ სააკაშვილისთვის ოფიციალური პოზიციის შეთავაზებას არ განიხილავს. ამის შესახებ მან "ქრონიკასთან" ბელგიის დედაქალაქ ბრიუსელში განაცხადა, სადაც ვოლოდიმირ ზელენსკი პირველი ოფიციალური ვიზიტით არის ჩასული.

იულია მენდელის თქმით, პრეზიდენტმა ზელენსკიმ „სამართლიანობა აღადგინა და დაუბრუნა მოქალაქეობა მიხეილ სააკაშვილს“. ხოლო რაც შეეხება მის კიევში დაბრუნებას, მენდელის თქმით, ეს თავად სააკაშვილის გადაწყვეტილებაა. 

„ამ დროისათვის, უკრაინის პრეზიდენტის ადმისტრაცია მიხეილ სააკაშვილისთვის შესათავაზებლად არ განიხილავს არცერთ ოფიციალურ პოზიციას. ზელენსკის ადმინისტრაცია ღიაა, გამჭვირვალეა და მზად ვართ ყველას მოვუსმინოთ. მზად ვართ მოვისმინოთ სხვადასხვა პოლიტიკური ძალის, მრჩევლების, ექსპერტების იდეები და ინიციატივეები. თუ მიხეილ სააკაშვილს სურს რაიმე სახის რჩევები მიაწოდოს პრეზიდენტ ზელენსკის, ადმინისტრაციაა ამისათვის ღიაა, მაგრამ ამ ეტაპზე მიხეილ სააკაშვილთან არ მიმდინარეობს მოლაპარაკება.

კიდევ ერთხელ ვიმეორებ, რომ არ განიხილება მისთვის შესათავაზებელი არცერთი პოზიცია. სააკაშვილისა და ზელენსკის შემდგარი ან შესაძლო შეხვედრის თაობაზე ინფორმაცია არ მაქვს. რაც შეეხება მიხეილ სააკაშვილის ექსტრადიციას, ახალი ადმინისტრაციის მიზანი იყო სამართლიანობის აღდგენა და ამიტომ დაუბრუნა მას მოქალაქეობა, სხვა საკითხები სამართალდაცავმა ორგანოებმა უნდა გადაწყვიტონ“, - განაცხადა უკრაინის პრეზიდენტის სპიკერმა.

4 ივნისს უკრაინულმა მედია გაავრცელა ცნობა, რომ ზელენსკის ადმინისტრაცია სააკაშვილთან თანამშრომლობის საკითხს განიხილავს. 

მიხეილ სააკაშვილი უკრაინაში 29 მაისს ჩავიდა. ეს მას შემდეგ გახდა შესაძლებელი, რაც პრეზიდენტმა ზელენსკიმ მას უკრაინის მოქალაქეობა აღუდგინა. მიხეილ სააკაშვილს უკრაინის მოქალაქეობა ექსპრეზიდენტ პოროშენკოს განკარგულებით 2017 წლის 26 ივლისს ჩამოართვეს. ყოფილ პრეზიდენტ მიხეილ სააკაშვილს რამდენიმე სისხლის სამართლის საქმეზე საქართველოს პროკურატურა ედავება და მის ექსტრადიციას ითხოვს.

ასევე ოფიციალური ვიზიტით ბრიუსელშია ჩასული საქართველოს პრემიერმინისტრი მამუკა ბახტაძე, რომელიც აშშ-ის ელჩის მიწვევით აშშ-ის დამოუკიდებლობის დღესთან დაკავშირებით გამართულ მიღებას ესწრება. მანამდე გავრცელდა ინფორმაცა, რომ ბახტაძე და ზელენსკი ერთმანეთს შეხვდნენ, თუმცა ეს ცნობა ევროკავშირში საქართველოს ელჩმა ნატალი საბანაძემ უარყო.