უკრაინის საპარლამენტო არჩევნებში ზელენსკის პარტია იმარჯვებს. მთავარი

ვოლოდიმირ ზელენსკის პარტია უკრაინის უმაღლესი რადის არჩევნებში ლიდერობს. ეგზიტპოლის თანახმად, პარტიამ „ხალხის მსახური“ ხმების 42-44% მიიღო. „ხალხის მსახურის“ შტაბმა ასევე განაცხადა, რომ პარტიის წარმომადგენლები, წინასწარი შედეგებით, კიევის ყველა, 13 ერთმანდატიან ოლქში იმარჯვებენ.

მეორე ადგილზეა პუტინთან აფილირებული ვიქტორ მედვედჩუკის „ოპოზიციური პლატფორმა - სიცოცხლისთვის“ - მას ხმების 11-12% აქვს. მედვედჩუკმა ასევე განაცხადა, რომ პარტია არჩევნების შედეგებით ბოლომდე კმაყოფილი არ არის და „ბრძოლის ახალი ეტაპისთვის“ ემზადება. „ოპოზიციურ პლატფორმაში“ ასევე აღნიშნეს, რომ ისინი მზად არიან „ხალხის მსახურს“ დაეხმარონ, მაგრამ არ ითანამშრომლებენ პროევროპულ პარტიებთან.

ჯგუფ „ოკეან ელზის“ ლიდერის პარტიამ 5%-ანი ბარიერი გადალახა. ვიქტორ ვაკარჩუკის „ხმა“ არჩევნებში 6%-ზე მეტს აგოვებს. უკრაინის ყოფილი პრეზიდენტის, პეტრო პოროშენკოს და ყოფილი პრემიერმინისტრის, იულია ტიმოშენკოს პარტიები, ეგზიტპოლის თანახმად, 8-8%-ს მოიპოვებენ. დანარჩენი პარტიები უმაღლეს რადაში როგორც ჩანს ვერ მოხვდებიან, მათ შორის მიხეილ სააკაშვილის „ახალ ძალთა მოძრაობა“, რომელმაც ხმათა 0,4-ზე მეტი ვერ მოაგროვა.

ვაკარჩუკთან თანამშრომლობაზე თითქმის ყველა პარტია ლაპარაკობს. ვოლოდიმირ ზელენსკიმ განაცხადა, რომ მისი პარტია ვაკარჩუკს „სასაუბროდ პატიჟებს“. პეტრო პოროშენკომ თქვა, რომ მის „ევროპულ სოლიდარობას“ „ხმა“ რადის ახალ შემადგენლობაში „თავის მთავარ პარტნიორად მიაჩნია“. „ხმის“ კანდიდატმა იაროსლავ იურჩიშინმა განაცხადა, რომ პარტია მზადაა „პოროშენკოს და ტიმოშენკოს ძალებთან“ მოლაპარაკებისთვის, თუ ისინი, თავის მხრივ, მზად არიან „დეოლიგარქიზაციაზე სალაპარაკოდ“. თავად ვაკარჩუკმა განაცხადა, რომ პარტია მოლაპარაკებებს ოფიციალური შედეგების გამოცხადების შემდეგ დაიწყებს. „ჩვენ მზად ვართ პასუხისმგებლობის ასაღებად და მზად ვართ თანამდებობებისთვის“, - თქვა მან. 

რადის შემადგენლობა ყირიმის და დონბასის გამო არასრული იქნება. კანონის თანახმად, უმაღლესი რადის 450 დეპუტატიდან ნახევარს ირჩევენ პარტიული სიებით, ნახევარს კი - ერთმანდატიან ოლქებში. რუსეთის მიერ ყირიმის ანექსიის და დონეცკის და ლუგანსკის ოლქების ნაწილის სეპარატისტების კონტროლქვეშ მოქცევის გამო, 225 დეპუტატის ნაცვლად 199-ს აირჩევენ, ხოლო მთლიანობაში იქნება 424 დეპუტატი. ამ მომენტისთვის ერთმანდატიან ოლქებში კენჭისყრის შედეგები უცნობია. 

არჩევნებზე აქტივობამ დაახლოებით 50% შეადგინა. 199 საარჩევნო ოლქიდან 100-ის მონაცემებით, დაახლოებით 21:50 საათისთვის, არჩევნებში ამომრჩევლების 49,39% მონაწილეობდა. მოქმედი რადის პირველმა ვიცესპიკერმა ირინა გერაშჩენკომ (პოროშენკოს პარტიის წევრი) აქტივობას დაბალი უწოდა და განაცხადა, რომ ასეთი აქტივობა „საზოგადოების რეალურ სიმპათიებს ამახინჯებს“.

რადის არჩევნები ვადაზე ადრე ჩატარდა იმის გამო, რომ საპრეზიდენტო არჩევნებში ვოლოდიმირ ზელენსკიმ გაიმარჯვა. ზელენსკიმ რადა დაითხოვა და პრეზიდენტის მოვალეობის შესრულების დაწყებისთანავე ახალი არჩევნები დანიშნა. მას შემდეგ გასული სამი თვის განმავლობაში უკრაინის პარლამენტის დეპუტატებმა პრეზიდენტის ინიციატივები არ დააკმაყოფილეს, მათ შორის რამდენიმე მინისტრის მოხსნის თაობაზეც.  

ზელენსკიმ უკვე განაცხადა, რომ უკრაინის ახალი პრემიერმინისტრი „ეკონომიკის გურუ“ იქნება. პრეზიდენტის აზრით, მთავრობის ხელმძღვანელად უნდა დაინიშნოს „დამოუკიდებელი ძლიერი ადამიანი პროფესიული განათლებით“, რომელიც „პოლიტიკაში არასდროს ყოფილა“. კითხვას, შეიძლება თუ არა პრემიერმინისტრი სვიატოსლავ ვაკარჩუკი გახდეს, ზელენსკიმ უპასუხა: „ჩემი აზრით ეს კითხვა მას, ვაკარჩუკს უნდა დაუსვათ, რადგან ეს დიდი პასუხისმგებლობაა“.

ზელენსკიმ ასევე განაცხადა, რომ ახალი მთავრობის ფორმირებისთანავე და ახალი გენერალური პროკურორის დანიშვნისთანავე (მოქმედმა რადამ გენერალური პროკურორი იური ლუცენკო არ მოახსნევინა) კორუფციონერებთან ბრძოლა დაიწყება. „ახლა გაჩნდება მთავრობა, ახალი გენერალური პროკურორი, რომლებიც ყველა იმ დაპირების შესრულებაზე იმუშავებენ, რომელიც მე წინასაარჩევნო კამპანიისას გავეცი და რომლებიც ჩემმა პარტია „ხალხის მსახურმა“ დაამტკიცა“, - თქვა მან.