ტრამპმა პრეზიდენტობის მე-100 დღე პენსილვანიაში მიტინგზე გამოსვლით აღნიშნა

BBC-ის ცნობით, აშშ-ის პრეზიდენტმა დონალდ ტრამპმა პრეზიდენტობის 100 დღის აღსანიშნავად პენსილვანიაში, ჰარისბურგში მხარდაჭერების წინაშე სიტყვით გამოსვლისას ამერიკული მედია კიდევ ერთხელ გააკრიტიკა და ისინი ცრუ ინფორმაციის შექმნაში დაადანაშაულა. „ახლა ისინი ვაშინგტონში არიან, გვიყურებენ და აქ უნდათ რომ იყვნენ. არაფერი ისე არ მახარებს დღეს, როგორც ვაშინგტონის ჭაობიდან 100 მილზე მეტ მანძილზე თქვენთან ყოფნა,“- განაცხადა ტრამპმა.

პრეზიდენტმა განაცხადა, რომ თუ მედიის საქმიანობა სიმართლის თქმა და პატიოსნად მუშაობაა, მაშინ ამერიკელი ჟურნალისტები მკვეთრად უარყოფით შეფასებას იმსახურებენ. დონალდ ტრამპი თავისი პრეზიდენტობის მე-100 დღეს, ვაშინგტონში, თეთრი სახლში ამერიკელი კორესპონდენტების ასოციაციის მიერ ორგანიზებულ ტრადიციულ ვახშამზე არ წავიდა და ამის ნაცვლად, პენსილვანიაში, მხარდამჭერების წინაშე მიტინგზე სიტყვით გამოსვლა გადაწყვიტა. კორესპონდენტთა ასოციაცია 100 წელს მეტი ხნის წინ 1914 წელს დაარსდა და 1921 წლიდან ასოციაციის ყოველწლიურ ვახშამს ტრადიციულად ესწრება აშშ-ის პრეზიდენტი. დონალდ ტრამპმა ეს ტრადიცია დაარღვია.

„წამყვანმა მედია-საშუალებებმა უარი თქვეს ჩვენი მიღწევების სია გაეშუქებინათ, მათ შორის 28 ხელმოწერილი კანონი, საზღვრის გაძლიერება და უდიდესი ოპტიმიზმი,“-დაწერა ტრამპმა Twitter-ზე.

პენსილვანიაში მიტინგზე გამოსვლისას, აშშ-ის პრეზიდენტმა თავისი პრეზიდენტობის 100 დღეს პროდუქტიული და ქვეყნის ისტორიაში ყველაზე წარმატებული უწოდა და განაცხადა, რომ „წინ ბევრი დიდი ბრძოლაა.“