უილ სმიტი და ლეონარდო დიკაპრიო ამაზონის ტყის გადასარჩენად გაერთიანდნენ

უილ სმიტის და ლეონარდო დიკაპრიოს კომპანიები ამაზონის ტყის გადასარჩენად თანხას ერთად შეაგროვებენ. გამოცემა Just Jared-ის ინფორმაციით, დიკაპრიოს ფეხსაცმლის კომპანია Allbirds და სმიტის წყლის მწარმოებელმა ფირმამ JUST ფეხსაცმლის ორი მოდელი შექმნეს.

„მხოლოდ ერთი დედამიწა არსებობს და მისი დაცვა ჩვენი ვალია“, - ნათქვამია სმიტის მიერ გავრცელებულ განცხადებაში. 

ფეხსაცმლის დასამზადებლად მხოლოდ ბუნებრივი მასალები გამოიყენეს, მისი ყიდვა უკვე შესაძლებელია. მიღებული შემოსავლის 100% დიკაპრიოს ამაზონის ტყის ფონდში გადაირიცხება და მასშტაბური ხანძრის ჩაქრობას მოხმარდება.  

მანამდე გავრცელდა ინფორმაცია იმის შესახებ, რომ დიკაპრიო ამაზონის ტყის გადასარჩენად $ 5 მილიონს გამოყოფს.

ამაზონის ტყეში ძლიერი ხანძრები რამდენიმე კვირაა მძვინვარებს. ბუნებისდამცველები ხანძრებში ბრაზილიის პრეზიდენტს, ჟაირ ბოლსონარუს ადანაშაულებენ. 

ბრაზილიის პრეზიდენტი, ჟაირ ბოლსონარუ კი ამაზონის ტყეში ხანძრის გაჩენაში არასამთავრობო ორგანიზაციებს სდებს ბრალს. ხანძრის გამო ევროკავშირმა ბოლსონარუზე ზეწოლა გააძლიერა, ირლანდიამ და საფრანგეთმა განაცხადეს, რომ შესაძლოა სამხრეთ ამერიკასთან სავაჭრო ხელშეკრულება დაბლოკონ. სწორედ ამის შემდეგ უარყო ბოლსონარუმ განცხადება, რომ სხვა ქვეყნებს ბრაზილიის საშინაო საქმეებში ჩარევა სურთ. მოგვიანებით, მან ხანძრის ქრობის პროცესში ჯარი ჩართო.

„დედამიწის ფილტვებად“ წოდებულ ამაზონის ტყეში ბოლო ათწლეულების განმავლობაში ყველაზე ძლიერი ხანძარი 6 აგვისტოს გაჩნდა. მას ასეულობით მეხანძრე და სპეციალური ტექნიკა ებრძვის, თუმცა ამ დრომდე ცეცხლს ვერ აქრობენ.

26 აგვისტოს „დიდი შვიდეულის“ წევრებმა ხანძარის ჩასაქრობად 22 მილიონი დოლარი გამოყვეს. ასევე ცნობილი გახდა, რომ სტიქიასთან ბრძოლაში ცნობილი მსახიობი ლეონარდო დიკაპრიო ჩაერთო.

რა მნიშვნელობა აქვს ამაზონის ტყეს მსოფლიოსთვის, იხილეთ ამ ბმულზე.

როგორ ჩნდება ტყის ხანძრები, წაიკითხეთ ამ ბმულზე.